澳洲統計局響6月30日釋出統計數字，詳細分析澳洲現時嘅轉工情況。如果用一個大圍嘅角度去睇，由今年二月至今，喺澳洲整個職場裏便嘅轉工率大約為9.5%，即係話差不多每10個打工仔，就有一個轉咗工。下邊等我哋一齊去睇吓統計局講咗啲咩資訊俾我哋知道啦。
9.5%係一個平均數，如果查返跟返唔同嘅States嚟睇，首府 ACT 嘅轉工率係最高嘅，反而墨爾本同埋雪梨，轉工量整體係低於其他地區。
咁過去一年邊個行業嘅轉職率係最高㗎呢？根據統計處，專業人士嘅轉工率高達24%，遠遠拋離其他行業，同時間，專業人士係轉工啫，就唔係離開咗佢嘅專業。反而流水線工人、銷售、機械操作及司機等等，佢哋轉行嘅百分率係最高嘅，高達13%左右。當然呢個係同行業嘅基礎結構有關，呢啲轉行率高嘅行業，大家可以想像到入職嘅好多都係剛畢業嘅大學生、新移民等等，佢哋都會將呢啲行業視為進入澳洲職場嘅stepping stone，先獲取經驗，然後先至再轉工。
咁有邊啲工作係比較少人轉行嘅呢？水電、農業、礦業、地產這四個行業，轉行率相對偏低，當然係因為當中幾項係需要考取專業資格先至可以執業（例如水電），而農業及礦業因為集中喺偏遠地區，要轉行當然比較難；地產方面，現時主要大城市樓市成交仍然活躍，因此亦都係吸引咗唔少人繼續待在行業內發展。
年紀方面，越年輕嘅轉職率比起年紀大嘅就當然係越高啦，統計顯示超過14%嘅年青人（24歲或以下）喺過去12個月係轉咗工嘅，百分比隨着年紀而遞減， 60歲以上人士只有2.1%係轉過工嘅，呢個現象其實可謂正常，大家年青嘅時候都好可能係咁啦，當越來越大嘅時候希望越嚟越喺工作上穩定，就自然唔會隨便轉工。
喺過去12個月，大概有一百三十萬人係轉咗職，比去年同期增加二十萬。當中每13人就有1人係因為公司要縮減人手而失業，比起在2021年疫情期間每五人當中便有一位被裁，已經可以話係達到過去兩年嘅低水。同時間，大約有32%嘅人係因為薪酬理由而離職，其次係合約到期（8.9% ）、工作環境惡劣（11.9% ）以及家庭原因（9% ）。順帶一提，女性因家庭原因而離職比例比男性高大約2.5倍，基礎上都係因為懷孕生子而需要改變家庭工作結構，而男性根據資料，比女性多機會被裁員（9.2% vs 6.7% ）。
現時澳洲勞動市場人手緊拙，之前都已經同大家分享過僱主喺招聘方面所遇到嘅困難，以及求職者嘅心態。上述嘅統計俾我哋睇到，就業市場都係仍然處於employee market，企業仍然需要面對 high turnover的情況。睇完上述資料之後，喺轉工嘅時候你會唔會有多重考慮呢？
作者：Sydney HR 的日與夜
關於作者：作者為一企業人事部職員，同時為合資格Life Coach，國際九型人格師、MBTI及DISC Advance持牌培訓師。最鍾意玩玩具同寫下嘢。現我城隕落，無比哀嘆，盼一盡綿力，將文化保存，以文會友，抒發一下。這篇文章，歡迎轉載。
