FR 嘅 workforce 座談會探討咗人工智能未來點樣影響唔同專業嘅發展方向。
隨住人工智能越嚟越普及，依家好多工序都可以交畀 AI 處理：無論係撰寫文件、程式編寫，甚至幫你發展一啲概念、推敲邏輯，都唔再係難事。既然 AI 咁強大，係咪即係代表我哋以後可以輕鬆啲？甚至唔使再做嘢？但如果你回望歷史，其實未必咁簡單。
AI 出現之前，人類都已經經歷過幾次大型工業革命。每次新科技嘅出現，表面睇好似幫人減輕咗工作負擔，但實際係咪真係令到大家唔使做嘢？未必喎。
由農耕社會講起，自動化技術確實令生活輕鬆咗啲。一啲以前需要人手做嘅重工，例如耕種、運輸、搬運，當機器一出現，效率即刻倍增。但取而代之嘅，就係新一輪嘅人手需求——機器始終唔會自己運作，總有人要維修、保養、操作。結果就係，工種轉型，人要重新學習點樣同機器共存。
去到互聯網時代，再到而家 AI 時代，其實人類不斷重複緊呢個循環。科技冇令工作變少，反而令工作型態改變咗。你試諗吓，冇 email 嗰陣，一日可能處理幾個電話已經夠晒忙；而家每日起身就要面對幾十甚至幾百封 email，節奏快咗，壓力大咗，未必真係輕鬆。
從技術角度睇，現代人雖然掌握得多啲科技，學識高咗，但要處理嘅資訊量亦都多咗。每個崗位要求都越嚟越專業化，唔再係以前咁可以簡單由一個行業跳去另一個。每個行業背後都有一套越嚟越複雜嘅知識結構。持續進修變成基本要求，甚至要「實時更新」知識。
以前你識一門技術，可能可以穩穩陣陣做十年；而家科技更新速度快得多，五年就可能翻天覆地。你唔追上就會被淘汰，仲未計 AI 將會再進一步加速整個技術演變嘅週期。
無論係手機、應用程式、網絡生態，近年嘅變化速度比起 2000 年代初更加誇張。喺呢個「唔進則退」嘅時代，我哋唯有加快自己學習同適應嘅步伐。
咁你話，AI 出現係咪真係令我哋生活輕鬆咗？定係，其實只係令我哋活得更加繃緊呢？
作者：Sydney HR 的日與夜
關於作者：作者為一企業人事部職員，同時為合資格Life Coach，國際九型人格師、MBTI及DISC Advance持牌培訓師。最鍾意玩玩具同寫下嘢。現我城隕落，無比哀嘆，盼一盡綿力，將文化保存，以文會友，抒發一下。這篇文章，歡迎轉載。
