其實做人事部好多時候都會面對好多自己知可以俾其他人知嘅事，上至公司嘅未來策略，任何人士嘅變遷，請人、炒人、甚至乎係員工一啲個人嘅問題等等，作為人事部，唔多唔少都會涉獵。所以好多時候我哋都積積埋埋好多「不能說的秘密」，谷住谷住，長期都好影響心理狀況。
最簡單嘅例子就係人事部一般都係屬於劊子手，有任何員工需要被開除，人事部就一定走唔甩，就算唔係負責講嗰個，你都要坐喺度睇住成個過程，為免講嘢嗰個一個唔覺意噏錯啲乜就後患無窮。你知啦，喺澳洲公平工作嘅條例多到阿媽都唔認得，萬一講嘢嗰陣一時漏口講錯嘢，個員工同你玩起嘢上嚟，執住你嗰句就訴諸法律同你死過。要知道有咩冬瓜豆腐人士一定係第一個祭旗者，寫report、甚至要上庭解釋，淨係文件都多到七彩，你話唔煩就假。啲case一個唔覺意拖返你半年九個月，除咗日常工作主要應付聆訊，你都咪話唔大壓力。
各個部門嘅經理又當咗你係人肉百科全書，阿邊個幾時入職、做咗幾多年甚至今年貴庚，佢都希望你能夠用九秒九嘅時間回答佢，否則你就辦事不力，效率成疑。
我個人好老實嘅，面對着咁多唔同每一日嘅挑戰，有陣時都真係會感覺到十分沮喪，一來人工又唔算高，二來尤其是係要做劊子手嗰陣，你要將一個人嘅生計親手掠奪，雖然，佢可能係表現不濟，又或者係入職冇耐發現原來唔適合，講真係商業社會絕對無可厚非，然而做郁手嗰個，點都有少少創傷症候群。
好多時候放咗工都仲係Carry住呢啲嘅情緒，雖然我成日都話，講笑咁講，我哋做人事咁耐嘅人，一般都係冷血嘅，因為手起刀落真係唔係個個做得到，真㗎，我見唔少。有一次幫朋友開除員工，個supervisor呆咗咁望住我，話佢未做過啲咁嘅嘢，最終我就企咗起身行咗出去幫手處理件事。信唔信都好，到現時為止，我都差唔多記得哂每一個開除過嘅人。
所以我成日都話，對人事部啲同事好啲啦，唔係因為佢長住生殺大權，而係佢哋其實都面對唔少嘅壓力，笑面迎人嘅時候，其實背後真係頂住唔少嘢㗎。
關於作者：作者為一企業人事部職員，同時為合資格Life Coach，國際九型人格師、MBTI及DISC Advance持牌培訓師。最鍾意玩玩具同寫下嘢。現我城隕落，無比哀嘆，盼一盡綿力，將文化保存，以文會友，抒發一下。這篇文章，歡迎轉載。
