藝人王宗堯，被控暴動罪和進入或逗留在立法會會議廳範圍罪，案件將於5月開審。他在等待審判逾3年間，演出機會變得愈來愈少，加上在香港白色恐怖的氛圍下，加劇了他在娛樂圈的孤立。雖然幕前事業停滯，他仍然堅持做有意義的事，包括創立自己的品牌幫助同路人、撐黃店等。面對未知的裁決，縱使他很愛香港，但認為他的「家」已變質，若未來要離開，也不會感到可惜。
王宗堯（Gregory）於2019年7月1日，涉進入立法會會議廳，被控暴動罪以及進入或逗留在會議廳範圍罪，案件將於2023年5月開審。
審訊在即，Gregory心頭並沒有太多想法，目前開始專注準備官司，他認為相比其他仍在還押等待審判的人，自己算是幸運。「我覺得呢幾年等候審判途中，我比較幸運，相比有啲人要還押、一路等待，對佢哋嚟講係好唔公平，亦都好不幸；但同時我亦都係一個某程度上失去一啲自由嘅人，因為審訊嘅陰霾喺頭頂籠罩住，冇辦法plan其他嘢，亦都冇得去工作。」
由於保釋期間需交出旅遊證件，不得離開香港，加上案件過了3年多還未正式開審，對Gregory接工作無疑是一種窒礙，即使有工作邀約亦無奈放棄。「就算有工作機會喺眼前，但好多嘢要就住，好多嘢都唔敢行。之前都有傾過一啲project，就算唔喺香港拍戲都好，可能去外國做一啲比較上國際少少、其他地方嘅劇，但礙於出入境限制，比較麻煩，咁無謂煩到人哋，所以到最尾都告終咗。」他認為這就是現今政權最想做的事：「好折磨你，所以有好多案件，47人案又好，暴動案又好，我相信佢哋（被告）都係諗，唉，算啦，快快脆脆了咗件事算啦，認唔認都好。」
再者，近年香港娛樂圈瀰漫白色恐怖，Gregory是現今圈中極少數就政治立場表態的藝人，亦因為這個原因，他明白在香港，自己的機會只會愈來愈少。「喺香港依家呢個氣氛之下，好多自我審查、白色恐怖，令到大家對於一啲比較上有獨立思想、表態嘅幕前人會有一定卻步。始終一部戲、一部電視劇，都係好大投資，當持份者好多嘅時候，更加感受得到只有一種聲音嘅情況。」
反送中事件發生前，Gregory事業正穩步上揚，早年參演香港電視網絡劇集《選戰》及《導火新聞線》等均引起公眾回響。可是，面對目前事業被迫停滯，他依然認為做有意義、具質量的作品，比起工作量更為重要。「我覺得決定咗做演員呢個career path之後，一路都係想做一啲有質量、有意義嘅作品，多過於多產。其實我唔係咁鍾意拍賀歲片，覺得熱熱鬧鬧大家開心，最尾同大家拜個年就完成，好似唔知做乜嘢咁。大陸劇我又拍過，戲種可以選擇嘅題材唔多，宮廷戲啦，抗日片啦，一大堆真人騷啦，首先要成為大灣仔先啦，披荊斬棘啦，唱唱吓歌又要剃頭啦，都係為咗迎合市場，做一啲平時自己都唔特別會做嘅事咁。」
因此，Gregory繼續忠於自己，做他認為有意義的事，幕前工作減少，就埋首發展自己的品牌，到處撐黃店，月前更為事隔3年再度拍戲、周冠威執導的《一人婚禮》四出謝票，忙得滿足。不過，他慨嘆能夠生存下來的黃店已經不多。「2019年對於好多人嘅習慣係一個分野，真係想淨係幫襯同路人理念嘅小店，不過依家都好灰，疫情、政策，再加上打壓，仲可以繼續維生嘅小店經營都好困難。」
而為了其有份創立的品牌「手足不散」，Gregory更放下男神身段，親力親為到葵涌貨櫃碼頭為客人寄貨，本以為將貨品包得企企理理去交低就可以，但原來手續繁複，當中經歷令他十分難忘，絕對是一項技能解鎖。「我係去咗做貨車司機咁，去咗貨櫃碼頭裏面，要去清關，嘩，完全唔識，好彩有個好好人幫我，幫我寫埋啲label，教我點填嗰啲單，因為本身唔係填得好清楚，要重新填過。入到去又要排隊，我覺得貨車司機最勁就係耐性，因為排清關條隊好長，每個人都有好多嘢要搞，填好多文件，又要去唔同樓層辦手續，又要make sure啲packing啱，又要填晒貨物價錢。唔係一般人會接觸到嘅嘢，徬徨嘅，但未至於崩潰。」
受官司困擾逾3年，不單Gregory本人，家人及女友亦難免擔心，講到事件發生後甚至未來，如何面對父母？他不禁嘆氣，並苦笑說：「我都唔知喎⋯⋯當然會令佢哋擔心，我諗佢哋都明嘅⋯⋯好難解釋，除咗明白體諒之外，唔知可以講咩。」至於拍拖3年多的圈外女友，一直陪伴他面對官司及事業低潮，不離不棄，更成為他與家人之間一座橋樑，Gregory對她讚不絕口，說時不禁流露甜蜜之情：「女朋友好幫手嘅，大家互相精神扶持好緊要，我負責照顧佢日常生活、起居飲食之外，仲照顧佢啲貓，但佢俾我嘅support好多，幫我一齊處理未來一啲比較technical少少嘅問題，呢個女朋友比較成熟啲，同我屋企人相處得好啲，成日幫我同屋企人之間做協調，同埋幫我take care佢哋日常生活大小事」。
「香港係自己屋企」，Gregory受訪時不只一次提到他對香港的愛，為了保衞香港這頭「家」，他毅然走上街頭，對抗暴政，結果犧牲了自己的銀色旅途，更被告上法庭。見證自己的「家園」被徹底破壞，對香港還有情嗎？2009年從台灣回港發展的他，特別感慨：「記得當年決定將事業基地搬返香港嘅時候，覺得香港係自己屋企，香港電影由細到大對我有好大影響，香港有我屋企人啦，呢度有好多我細個嘅回憶，香港的而且確係一個好特別嘅地方，有啲嘢始終代替唔到，會掛住一啲嘢，城市嗰種氣色，或者香港獨特嘅物品、風土人情、文化。不過，我依家覺得香港係唔同咗，有啲嘢真係冇咗或者返唔到轉頭，簡單啲講，我覺得就算他朝有日同呢個地方告別，係唔再可惜。the city is dying，係真係die咗。」
5月底案件終於正式開審，無論結果如何都是一個解脫，當一切事情都過去，回復自由身之後，Gregory最想做甚麼？他想了想，打從心底笑說：「飛囉。」原來他最想出外走走，見見朋友，感受一下自由的空氣。
棱角編輯部
支持我們：https://points-media.com/supports/
