英國組織 Trafford Hongkongers CIC 主辦的《5 月 35 日》讀戲劇場近日於列斯和伯明翰完成兩站共 3 場演出，演員葉嘉茵、胡俊謙，以及 Trafford Hongkongers CIC 董事 Alex Mak 劇終後接受《棱角》專訪，他們透露總入場人次有三位數，跟過去兩年相近，其中胡俊謙提到有家庭帶同下一代進場，「好開心見到家長帶小朋友，畀佢哋認知呢個歷史，呢個係有啲感動」；葉嘉茵則稱有觀眾不懂廣東話，只靠字幕理解劇情但仍受感動，她形容「件事好值得，個意義同價值就喺呢度」。
《5 月 35 日》劇本連續第 3 年獲「六四舞台」授權以讀戲形式演出，過去兩年演出地點皆位於曼徹斯特。Alex 表示去年在曼徹斯特的演出入座率較 2024 年遜色，故本年移師列斯和伯明翰，過程中需與兩地組織合作宣傳，「離開咗自己熟悉嘅地方，我哋都好靠其他組織透過佢哋嘅網絡，向當地嘅香港人群體宣傳」。葉嘉茵亦稱宣傳屬挑戰，「有啲觀眾話係好後好後先知（演出資訊），係咁啱得閒先嚟到」。
難忘觀眾不懂中文仍受感動
Alex表示今年劇組向「六四舞台」借用英文字幕翻譯本，雖然來自香港以外的觀眾只有數人，不過亦獲對方反映稱「覺得個劇本好有意義」。他認為在英港人出席六四集會時，可嘗試多用英文向其他族裔的居民講述事件，「解釋我哋紀念緊啲乜嘢」。葉嘉茵憶述演出後跟非中文觀眾交流時，對方表示受演出觸動，「佢話雖然聽唔明廣東話，只能夠依賴字幕，但都覺得好好睇……雖然我哋做廣東話版，但都有機會吸引到啲本地人入場睇呢個戲」。
胡俊謙則稱對有觀眾一家大小進場感驚喜，「有兩個 7 歲嘅小妹妹，亦有啲初中嘅小朋友」，對此表示感動，「因為呢個唔係比較有娛樂性嘅劇目，而且對於小朋友，我相信家長帶得佢嚟，返到去會解釋畀佢聽，個故仔係發生緊咩事」。
葉嘉茵稱讀劇形式與一般舞台劇或政治集會有別，「有啲觀眾都同我哋講，『吓，你哋做讀劇呀？啲人聽完你哋個戲，下年未必返轉頭』，咁個人數會一路下降」，惟依然希望明年可再次公演，「希望可以繼續喺呢件事上面出一分力」，但亦要視乎團隊的負荷能力，每年亦要重新向「六四舞台」索取授權。至於其他劇本，葉嘉茵稱需考慮版權和演出規模，「其他戲就多咗好多群戲」，坦言未必找到足夠演員。
「稍為有良知嘅人，都應該知自己立場」
曾於香港學校任教的胡俊謙稱以往會在課堂向學生講述六四事件，「好明顯過咗 2020 年就無可能啦」，如今他在英國亦有學生，計劃花時間繼續提及六四。胡俊謙認為不同人有各自悼念六四的方式，「我嘅方法就係傳承」，稱重點並非灌輸立場，而是告知事實，「畀佢哋知有呢件事發生」。
胡俊謙形容六四事件與其他國家爭取民主的歷史本質上沒有分別，「有惻隱之心嘅人，都會知呢件事係好黑與白嘅事」，稱八九民運參加者試圖以和平手段讓世界變得更好，卻被本國軍隊殺害，「無咩好討論……稍為一個有良知嘅人，都應該知道自己嘅立場係乜嘢」。
葉嘉茵則稱她就讀大學時首次出席六四燭光晚會，形容對集會被禁感震撼，「唔係講緊 721 遊行、831 遊行，係連六四集會都無咗」，她如今會在家中向下一代講述六四歷史，「食完飯，我就會擺啲蠟燭燈、熄晒燈，然後我就會播啲片段，當然我唔會揀啲太血腥嘅」。葉嘉茵形容紀念六四是屬於香港人的活動，亦影響她對民主的看法。
對於將來，葉嘉茵坦言無法肯定明年會否再演出，「呢個戲喺英國做唔容易，因為有境外國安法，大家驚，我搵唔搵到……我要有 3 個演員見觀眾嘅、要見樣嘅，我搵唔搵得齊人已經係一個難度」，即使有人願意演出，成本也是重要考慮，「基本上大家都係攞緊車馬費嘅狀態去做」。
Alex 透露部分地區組織有聯絡團隊，期望明年到更多地方演出，但團隊暫未有具體計劃，亦憂慮若到規模較小的城市演出，觀眾可能不足。Alex 透露演出「未到超級倒貼」，主要開支是場租和車馬費，期望日後如有盈餘可作「有意義嘅用途」。
棱角編輯部
