民主派初選案被告之一、前地區組織天水連線成員伍健偉周五（25日）服刑期滿，獲前天水連線成員林進及親友迎接。伍健偉其後接受傳媒訪問，他表明從未後悔當年選擇，認為只是做一些對香港未來更好的事，至今依然希望「自由、公義、人人都免於恐懼嘅香港」的夢想成真，會盡力留在香港。伍健偉提到仍有很多人正服刑，感謝所有支持在囚人士的親友，「相信佢哋有一日一定會團圓」。
伍健偉周五（25日）上午離開其服刑的石壁監獄，此後回到元朗跟親友「飲茶」並接受傳媒訪問。伍健偉稱對能跟朋友、伴侶重逢「有啲高興」，回顧首次被捕時只有 24 歲，「出返嚟就 31 歲喎」，形容「好奇怪，我都未係好習慣我係三字頭」，對一些社交活動如擁抱、親吻等亦感到「好唔現實」。
伍健偉回顧過去數年光陰，透露約 5 年時間被單獨囚禁，「喺一個四面都係牆，可能有一兩扇窗嘅地方……電視都無睇過」，亦一直睡得不好，「每一晚我可能都會不斷咁樣，因為好多諗嘅嘢，或者好多聲音呀，而醒十次八次，去到第二朝眼光光等開燈」，亦提到獄中的夏天非常酷熱。他坦言過程中有傷心、迷惘、憤怒，「但我無一刻唔為到我自己去驕傲，因為喺當年，我選擇咗為香港做一啲，我認為可以對香港嘅未來更加好嘅事情，我有選擇去付出、我有選擇去犧牲」。
伍健偉獲釋時正值中秋節，他表示沒「特別計日子」，稱在囚期間最期待親友探訪和派發家書的時間，「呢兩樣嘢都代表住，呢個地方有人未忘記我哋」。伍健偉提到仍有很多人服刑，對此表示感觸，「相信佢哋有一日一定會團圓……仍然有好多人未必有機會可以重逢」，感謝所有仍然等待服刑人士的親友不辭勞苦，為在囚者打點生活所需，「佢哋係明白到呢份感情係難能可貴……係無價」，希望所有人互相扶持，「最後大家一定會可以再見面」。
｜認需面對現實：用新方法貫徹信念
伍健偉承認留港的市民需面對現實，「的而且確時代已經唔同咗……既然現實係咁樣嘅時候，我哋只能夠用新嘅方法，去貫徹返自己嘅信念」。他表示相信人性對自由和公義始終「帶住一股熱熾嘅期望」，監獄和囚禁不能阻止人類對自由的渴望，「恐懼亦唔可能阻止良知嘅呼喚」。他稱依然希望在適當位置貢獻香港，寄語「我哋約定再見，就會喺我哋應許之地再見」。
曾任嘉湖北區議員的伍健偉表示希望重返嘉湖，亦有考慮是否「換一個身份」幫助居民，認為自己即使不再是區議員，也能服務居民，「大家唔好覺得呢個地方，好多嘢就咁就算……好多時有無用呢件事，要靠行動同埋時間，先能夠去展示到個成果」。他稱仍有很多人想香港變得更好，「大家亦都喺唔同嘅崗位去努力」，認為今時今日人們需更有智慧、更團結和更堅定，以達至彼此的追求和理想。
｜譚得志鍾錦麟料明年出獄
伍健偉 2020 年參與民主派立法會初選，於新界西取得 20,525 票排第四，有望成為民主派出選名單之一，最終因該屆立法會選舉押後告吹，伍健偉及其他 40 多名初選參加者 2021 年被指圖透過初選取得立法會多數議席，並按照《基本法》規定否決財政預算案，以逼使時任行政長官林鄭月娥回應「五大訴求」，從而串謀「顛覆國家政權」被捕。伍健偉選擇認罪，被判監 5 年 7 個月。
初選案下一名出獄被告原為 2027 年 1 月刑滿的黃之鋒，惟他服刑期間再被指於 2020 年勾結外國勢力，案件即將判刑，料極可能未能如期出獄。另外兩名被告鍾錦麟和譚得志（快必）則預計明年上半年出獄。
棱角編輯部
