一年容易又到新年。第三篇遇正過農曆年，喺呢樹恭祝大家恭喜發財，身體健康🧨🧧
人在異鄉倍思親。今年已經係細粒姑喺外國渡過嘅第三個新年。當你住喺一個鬼佬國家你好難奢望你自己嘅傳統節日市面上會有啲乜嘢節慶氣氛 （雖然聽聞香港嘅節日氣氛都唔算得好濃厚… 哈佬 Hong Kong…）
呢幾年喺外國生活嘅其中一個感悟係，移民嘅生活，唔代表你要捨棄忘記你嘅出身喺邊度，而係要點樣喺融入他人嘅文化同生活之中，同自己嘅文化中間，去攞一個平衡。做人唔應該忘本、要毋忘初心，喺自己嘅傳統節日，都應該要做返出嗰啲多儀式感嘅。始終喺異鄉過節，特別容易孤單、寂寞、涷（嗯，不過澳洲依家夏天好熱。）
儀式感呢樣嘢我就覺得豐儉由人，可大可小，反正都係隨心隨能力所及，做到幾多得幾多。最重要嘅唔係你搞咗幾大壇龍鳳，而係要感受、維持到自己同原生文化嘅一啲連結，噉樣我覺得已經好足夠。
好似細粒姑生活嘅城市，好好彩有一班義工搞香港人年宵，又有政府為咗推廣文化共融，每年大年初一都喺唐人街搞舞獅表演同逐家商戶去逗利是呢啲習俗嘢（劣習？）。今年仲封埋條路，請哂樂隊大搞亞洲美食節添。反正我一向喺香港嘅時候家人都唔鍾意高調地過節日，喺呢啲氛圍下我都只係簡單地入年宵打咗個轉，返屋企自己少少哋整咗底年糕，再睇返套陳年賀歲片就算。仲有再加埋週末去行個山行返個大運？我就真係已經夠哂皮啦。始終喺鬼佬國家，農曆新年冇假放、冇利是𢭃，瞓醒覺咪又係準時返工。
對我嚟講新年真正嘅重頭戲係約個時間，跨越時差，視像參與拜年，打吓電話比家人朋友吹吓水（或者仲可以加埋PayMe派利是？除咗攬攬老豆老母之外有咩係現今科技遙距做唔到？）。每逢佳節最重要係see親，感受吓同親朋好友連結嘅嗰一種力量，支持你繼續過活下去，趁住Loong Loong佳節，平日唔係成日傾到偈嘅又借啲咦聯絡吓。我諗呢一啲先至係節日意義。講到尾，節慶日子最重要係同你來自嘅地方同社群嘅聯絡，大家講返共同嘅語言互相問候，feel like you are not a loong (alone)，而唔係區區嗰一塊年糕或一舊月餅吖係咪？
—
2024嘅細粒姑挑戰新corner！
細粒姑娘嘅隨筆噏
精神唔再係講病，而係點樣達至精神健康
每一期，兩個字做標題
可以係某一個階段
可以係某一個徵狀
希望可以及時補充你嘅能量
繼續喺異地撐住你嘅香港人生
