新嘅一年，相信大部份人都已經重新開工。新年伊始，不如又噏吓「前路」呢兩個字對移民嘅意味。
唔知點解，前路後面，就好容易接住「茫茫」兩個字。小妹覺得，談及前路嘅時候，首先你要知道自己移民嘅意義係乜嘢？目標係乜嘢？
熟悉我嘅朋友成日會聽到我講，移民有推因素（push factor)同拉因素(pull factor)：你原本嘅生活過得夠好，你唔會想諗住走；移咗民之後生活仲差咗，你就自然會好想回頭。相信好多人移民都係為咗下一代有更加好嘅教育同埋換一個好啲嘅成長環境。後生啲如細粒姑嘅可能就會想係去新嘅地方找新嘅機會同發展空間。無論你嘅目標係點，你嘅目標就等於你前路嘅終點站，而引領你去到終點站前面嘅嗰條路清晰、順直與否，每一個人都有唔同嘅幫手、際遇、阻礙、關卡、同伴隨唔同嘅經歷。當你本身都唔知自己走嚟為乜，你梗係覺得茫茫啦… （不過唔使驚，當你唔知走嚟為咩，你嘅目標可以係：「找離開嘅意義」 — 澳洲文化教曉我enjoy咗個過程都可以係一個成功!）
不論高山定低谷，唔少人找我談心時比我嘅感覺都係你睇我好、我睇你好。有人條路看似順利，但一家唔知一家事，又或者係幸存者效應；當然仲有有心人會將失敗例子放大，以偏概全嚟寫報導，用意係咩就自己估啦😌
路係點，都係人行出嚟，最緊要知道自己行緊努力緊為乜。當越過個高山，回望走過嘅路，又自然係另一番感受。人走過嘅經歷永遠唔會係冤枉，因為每一條行錯嘅路或轉錯嘅彎甚至遇錯嘅人都會引你返去正確嘅路 — 條路似乎唔係路？時辰未到姐。
加油啊。攰就抖抖。離開咗香港高壓嘅環境，得到嘅係喘息嘅空間。坐下抖足精力，再吸口氣再衝過。香港人係打不死嘅💪🏻
—
2024嘅細粒姑挑戰新corner！
細粒姑娘嘅隨筆噏
精神唔再係講病，而係點樣達至精神健康
每一期，兩個字做標題
可以係某一個階段
可以係某一個徵狀
希望可以及時補充你嘅能量
繼續喺異地撐住你嘅香港人生
#細粒姑講吓經 #移民精神健康 #前路
