潘源良入行三十年創作超過600首歌詞，《最愛是誰》、《愛情陷阱》、《十個救火的少年》等等名歌有排數。近年潘源良跟太太移民台灣，新搞作是將於今年12月在英國曼城開《潘源良有辣有唔辣二創人生》音樂會，全部歌詞都係新創作，難得64歲的潘源良拒絕變廢佬，創作力量仍然可以嚇你一跳，未見歌詞先睇歌名如《我城》、《正義女神》、《英倫路上》、《禁歌》等，已經不難感受到歌詞都是近年香港不能說的內容兼心聲，不禁期待再有一堆新的經典歌詞出現。潘源良要寫出貼地歌詞，當然不能讓自己out，即使人在台灣仍有留意香港樂壇。對於近年香港年青新人湧現，潘源良覺得係百花齊放兼可喜：「 其實樂壇就係不斷改變啦 ，以前邊有咁多合唱或者組合呀？依家佢哋又可以唱組合又可以單飛， 另外有啲樂隊又會有自己嘅團員配合。 我覺得算係幾百花齊放。」
新人年年都有，但最難得係近年出道的這批年青人敢於表達自己，同過去依靠大唱片公司生存的歌手生態又有很大分別：「 係佢地創作範圍入面， 涉及既都係佢地生活既體驗 ，同時都係年輕人所關心既議題。以前就好多代言式既填詞人，男人又會去幫女人寫歌詞， 另外可能好似係四大天王咁，可能一個歌手夾開一個幫佢寫野嘅人。而最近例如個班喺TV（選秀出道）嘅，佢地都會有自己個人想法，比如姜濤咁， 佢唔單止參與歌詞、 MV甚至意念呀等等， 有時包括埋製作添 ，好似拍MV等等都會去參與， 所以係以前比較少出現嘅。」
年青歌手敢於為自己發聲，自己做製作，漸漸擺脫唱片公司「叫你點就點」的工作模式：「我估計以上嘅情況會一路發展落去。佢地都按照自己嘅心聲放入自己啲歌入面， 好獨特地就成為自己嘅聲音，而唔係其他人加諸佢地身上或者其他人幫佢地寫嘅內容，所以我覺得呢種既發展係好合理同埋幾好嘅，多啲唔同嘅聲音，同多啲唔同後生仔敢表達佢地嘅感覺！」
同溫層效應
過去歌手出碟要製作十多首歌成本高自然包袱大，一碟滯銷分分鐘即時死亡。現在歌手出歌逐首計，照計應該有效減低成本，出歌看來亦比過去簡單，但潘源良覺得現代樂壇其實都不易玩：「唔同嘅人有唔同嘅Fans，唔同嘅走向， 變成每個人自己去追 或者網上自己接觸，好難好似過去咁樣，一隻歌寫出嚟，電台又播電視又播，四圍都聽到，出歌可能真係易咗，但變成聽歌嘅人真係要自己去搵首歌出嚟聽，依家樂壇整體情況就係好似FB，好似有好多轉載，又有唔同人會互相傳嚟傳去，但有時同溫層就只係你哋自己轉， 好難轉到去未聽開嘅受眾，唔只香港， 其實外國都係咁，有啲大明星個個都識，但唔係人人聽過佢地啲歌，可能好多人係知道呢個歌手佢好靚呀，開演唱會時賣好貴飛呀…… 但係佢有邊幾首歌呢？大家卻未必講到出嚟， 呢個係依家網絡年代好唔特別嘅現象，真係唔同以前咁樣一個（歌手）就可以橫掃，全部人個個都拍晒手掌。」
樂壇唔易發圍，廣東歌亦面臨挑戰，但潘源良仍對這批新人的能力充滿信心：「其實唱得好嘅新人的確都唔少， 亦個個都好唔同，我覺得有心嘅後生仔，或者有能力嘅後生仔，同埋有創意嘅後生仔 ，佢哋都係名符其實嘅，佢地有雄心大志， 例如講到將廣東歌再復興啦 ， 再傳到去整個亞洲等等， 我相信佢哋有咁嘅能力。」
棱角編輯部
