香港名詞人、64歲的潘源良（潘SAN）2019年曾在香港舉行《潘源良生炒廣東話之有辣有唔辣二次唱作騷》，展現了充滿活力及創意爆棚的二創歌詞演唱會。至今年6月，已移民台灣3年的潘源良，再於當地 live house 開了兩場「二創人生」音樂會，當晚潘San唱得盡興，觀眾亦聽得投入興奮，一首接一首的舊曲新詞，歌詞仍是潘源良一貫拿手的貼地諷刺共嗚感動，當晚到場睇騷大都是移台香港人，人在異鄉難得全場同聲同氣句句廣東話，加上live house 地方細細，氣氛更加熱烈到爆燈。既然當晚全場香港人，開騷除希望用音樂鼓勵港人之外，原來潘San亦另有目的：「 因為同台灣個livehouse 其實都幾熟嘅，我地好多時都會係嗰度唱歌或者夾band ，我哋好希望可以係嗰度物色到啲後生仔，睇下佢地唱咩歌， 睇下大家夾唔夾到做啲事！」
人生都可以二創
二創歌曲歌詞能擊中港人心聲，潘源良實行添食，在今年12月，把音樂會帶到另一個更多港人移民的英國曼城 ，潘源良表示今次開騷又係一次意外：「因為我哋有好多二創既歌曲，上次台灣『二創人生』受歡迎，所以啲朋友都覺得可以係英國試下！」至於點解叫二創人生，潘源良解釋：「二創歌曲裡面會帶出一個訊息，就係一首歌出現咗，隨住時代改變，今時今日聽落就會有另一種感覺 ，當你今再轉另一啲歌詞入去， 可能一面係回應當年呢首歌出現時嘅經典氣氛，另一面亦可以反映呢首歌經歷過咁多年之後，可以變成一種唔同嘅感覺，我哋覺等呢個係好有趣嘅主題！」
音樂可以靠新歌詞獲新生命，潘源良覺得人生亦可以有take two：「有時我哋過去喺一個地方生活咁耐，有啲改變忽然出現，令我哋要去另一個地方重新開始人生另一個階段，咁其實都係二創嚟喎！ 所以無論歌又好， 人生又好啦， 都可以不斷去開創自己新一頁。」難得去到英國開騷，當然亦會接觸當地一些港人團體：「之前都接觸過，今次會再去， 希望可以多啲同當地香港人互相鼓勵， 知道佢哋都唔容易啦，好多嘢都須要支持多啲， 希望俾到多啲機會啦！」
所謂人在外地靠朋友，潘源良要在台灣搞二創音樂會自亦如是，無人幫手穿針引線好難搞得成。潘San今次更進一步，移師到山長水遠場地更大的曼城，當然更不輕鬆，搞得成原來緣份都好重要：「之前加拿大都有傾過 ，但始終加拿大定英國都好啦，要完成一次演出要好多嘅機緣巧合！好多事要配合，先要有場地，又要有當地樂手啦， 因為我地唔可以運咁多樂手去，仲有工程人員等等， 要當地有啲技術人員同我地合作，連樂手都係要逐個捉，睇下佢地有冇時間大家夾唔夾到啦，聚埋一班人有啲人唱有啲人彈。 今次我地亦會有一啲當地既樂手，當地嘅和音上台表演 ，以移居當地嘅身份同大家見面唱吓歌，成個場坐滿可以有三、四百人。」真心期望潘源良感動人心的精彩演出。
棱角編輯部
