喺澳洲其實同香港一樣都係有類似強積金嘅嘢嘅，呢度呢就係叫做superannuation，即管譯做老年退休金吧。其實澳洲嘅退休金制度可以話係由19世紀已經開始㗎喇，慢慢呢就變成今日嘅強制儲蓄計劃，當然目的就係為澳洲人提供足夠嘅退休保障。我哋可以預期呢政府嘅資助會慢慢慢慢減退，到最後希望能夠達成澳洲人喺退休生活得以自給自足。
澳洲嘅退休金制度一開始最主要係俾公務員，專業人士同埋軍人嘅，例如係老師、銀行業界等等。開頭嘅時候都係私人性質，大部份人都係未有呢個計劃保障。去到上世紀大概40年代，澳洲政府呢就開始將呢個社會福利同pension掛鉤，一直去到80年代先開始慢慢穩定。1992年就嚟到第一次嘅重大變革啦，當時嘅總理Paul Keating就提出僱主需要強制支付員工嘅退休金，一開始呢其實只係3% 㗎咋，目的當然係長遠為咗減輕政府嘅開支。
一開始政府要求退休金百分比嘅比例係由3%慢慢增加，而去到2025年呢，退休金嘅比例將會增至12%就封頂，而大家都知道，你嘅退休金唔會係由你所屬嘅公司管理嘅，一般嚟講呢都係由退休金公司（好多時候都係保險公司啦）去幫大家處理你嘅退休金，你亦都可以去銀行開戶口做一個叫做Self Manage Super Fund。
澳洲現時所儲蓄起嚟嘅退休金已經高達三萬億澳元，佢係由澳洲嘅APRA（澳洲審慎監管局）同埋ASIC（澳洲證券與投資委員會）監管，以確保呢啲嘅投資公司係會遵守澳洲法例同埋維持系統嘅穩定公平可持續性。
當我哋了解咗成個發展史之後，有幾樣嘢呢希望大家留意嘅。首先現時去到2024年，你嘅退休金百分比應該係你薪酬嘅11.5%，呢樣嘢呢應該喺你嘅糧單度呢係寫得好清楚，大家要留意。另外，如果你係冇一間用開嘅退休金管理公司嘅話呢，公司好多時候呢都會幫你開一間，其實呢就係佢哋用開嗰間。而你自己當然啦，亦都可以喺市場上選擇你心儀嘅退休金管理公司，一般都會收取Admin費用，咁人哋都要食嘅，所以同香港都一樣嘅，盡量就唔好有太多嘅退休金戶口，將佢哋擺埋晒喺同一個就得了。
喺你入職嘅時候公司會問你攞Super嘅資料，你一般需要去提供兩項資料就足夠㗎啦，第一就係你嘅退休金管理公司一個叫做USI（Unique Superannuation Identifier）嘅號碼，呢個號碼其實你只係需要上網將你嘅退休金公司個名喺Google搜尋，然後就加USI，你就會搵到呢個號碼㗎喇。另外就係需要提供你嘅會員編號，咁你公司呢就能夠幫你將退休金放入指定嘅退休金戶口。
要留意，發放退休金政府規定最少每三個月一次，有啲比較大嘅公司係會每個月供款嘅，所以你係要留意你自己嘅戶口係咪定期有退休金匯入，喺你嘅糧單度其實都會寫低究竟係有幾多嘅退休金已經撥備。另外要留意嘅係，退休金可以分兩部份，一部份就係強制供款（即係僱主必須支付嘅11.5% ），另一部份就係叫做自願供款 （salary sacrifice）。自願供款係有上限嘅，一年係唔可以超過$27,500（當中包括僱主供款） ，如果超過嘅話，退休金管理公司係會彈票（自願供款嗰筆），唔接受。另外就係有年齡嘅限制，如果你係75歲或以上嘅話，你喺過咗呢個年紀28日內需要通過工作測試條件，否則嘅話你嘅自願供款亦都不被接納。而嗰個工作測試條件就係你要喺嗰個財政年度內必須連續有30日工作40小時或以上。
最後係若然你係高收入人士，你嘅收入超過每年25萬澳元，根據稅務條例293條，你會被額外徵收15%嘅稅率。
一般嚟講，你去到65歲，你就可以開始攞到你嘅退休金㗎喇，如果你仍然工作緊嘅話，你仍然可以係提取部份嘅退休金，你需要同Centerlink聯絡，去作出安排。呢個係個好複雜嘅計算，建議你搵Tax Accountant去同你計吓數。計算你可以攞到幾多退休金。
希望呢啲嘅資訊能夠幫到大家去管理自己嘅退休金同埋更加了解退休金嘅運作。
關於作者：作者為一企業人事部職員，同時為合資格Life Coach，國際九型人格師、MBTI及DISC Advance持牌培訓師。最鍾意玩玩具同寫下嘢。現我城隕落，無比哀嘆，盼一盡綿力，將文化保存，以文會友，抒發一下。這篇文章，歡迎轉載。
