今年有幸參加由 Financial Review 舉辦嘅 Workforce Summit 2025。咁貴嘅座談會，真係要多謝公司肯畀錢支持，仲要係喺高級酒店搞，入到去都真係有種做返次「上等人」嘅感覺。不過呢類高級活動嘅代價就係要起身夠早 ：7:30要喺酒店嘅reception報到，8:00準時開始，絕對冇得瞓晏啲。
今次峰會圍繞幾個主題，例如在家工作（WFH）、人工智能（AI）、政府即將推行的新機制，同埋如何與新世代（Generation Z）共處職場等。由朝到晚唔同嘅Panel discussion密密麻麻，各個Topic都由業界嘅領袖人物分享，內容真係相當豐富，講真，聽完都覺得獲益良多。
簡單同大家分享幾個重點，等大家都可以掌握到行內對未來工作趨勢嘅睇法。我會喺之後幾個星期逐個主題深入拆解，大家可以慢慢Follow住。
第一：在家工作（WFH）：呢個Topic我哋之前都傾過好多次，但今次點解再被攞出嚟重點討論？因為政府計劃喺今年年中修改法例，將在家工作納入部分Award條款之中。業界普遍認為WFH已經係「無得返轉頭」，係職場常態。現時主流做法係每星期可以WFH兩至三日，呢個安排睇嚟短期內都唔會有太大變化。
第二：人工智能（AI）：AI依然係熱話。大部分業界領袖都認為AI唔係嚟取代人，而係嚟協助人。但前提係：你要不斷Up skill。如果你選擇唔學習、不進步，咁就真係有機會被AI取代。AI係一種工具，而唔係取而代之嘅威脅，關鍵係你點用。
第三：Generation Z 嘅職場融合：呢代人最重視嘅唔再係薪金同職位，而係「彈性（Flexibility）」、「工作要有意義（Purpose）」同埋能否配合到佢哋嘅個人需要。不過，佢哋喺面對面溝通技巧、了解職場文化同潛規則方面仍然有待磨練。問題係，上兩代嘅管理層反而唔夠膽開口指正，怕畀人話「唔尊重」，結果令到新一代冇乜機會學到真正嘅職場態度同工作價值觀。
未來幾個星期，我會逐一深入探討以上幾個議題，分享更多峰會入面嘅觀察同思考，等大家可以更清楚知道職場未來點走。Stay tuned！
作者：Sydney HR 的日與夜
關於作者：作者為一企業人事部職員，同時為合資格Life Coach，國際九型人格師、MBTI及DISC Advance持牌培訓師。最鍾意玩玩具同寫下嘢。現我城隕落，無比哀嘆，盼一盡綿力，將文化保存，以文會友，抒發一下。這篇文章，歡迎轉載。
