講到招聘，大家通常都會認為，求職者最重要嘅始終係履歷（CV）。有幾多年經驗、做過咩工作、讀過咩學校、識幾多種技能，全部寫晒喺張紙上面。公司 shortlist 完CV，覺得條件合適，先至會叫你嚟面試。So，what’s next？
CV 成功將你帶入面試室，但係去到面試嗰一刻，CV 仲有幾重要？作為多年 HR，閱人無數，我可以話你知，yes and no。冇數據支持㗎，咦？原來最近有個 research，quantified 我嘅想法。
最近一項刊登於《Personnel Psychology》嘅大型統合分析，研究咗 145 項研究、204 個獨立樣本，探討職場上「第一印象」究竟點樣形成，以及呢個第一印象對之後嘅判斷有幾大影響。研究發現，第一印象並唔係單純由一個人嘅能力或者履歷決定，而係由多種線索共同形成，其中溝通表現（communication cues）係最穩定、影響亦最強嘅一類線索。嘩，講人話得唔得？
好。就咁，第一階段係 CV screening。呢個時候，公司只能從你寫喺 CV 認識你。所以，工作經驗、學歷、專業資格、技能、成就等等，當然非常重要。靚仔嘅 CV，會令你得到 interview 嘅 entry ticket。當你 interview 嘅時候，情況就開始改變。
因為呢個時候，面試官已經知道你「做過啲乜」，咁下一個問題自然就係：「你究竟係一個點樣嘅人？」
你點樣回答問題、點樣表達自己、會唔會聆聽、遇到唔識答嘅問題點處理、講嘢有冇條理、同人互動自然唔自然，甚至係對方同你傾咗十多分鐘之後，覺得你係咪一個「想同你一齊做嘢」嘅人，呢啲全部都唔會出現喺 CV 入面。
CV 可以吹到天花龍鳳；面試嘅時後，就會見真章。
上面講嗰個研究發現，原來第一印象具有相當程度嘅持續性，而且溝通線索比單純內容線索更容易形成強烈嘅整體印象。換句話講，候選人一開口之後，招聘經理可能已經開始形成一個「整體感覺」：呢個人專唔專業？有冇信心？可靠唔可靠？容易唔容易合作？一旦呢個整體印象形成，之後聽到嘅資訊，有可能會被放入呢個框架入面解讀。
好多人以為面試係一個客觀評估過程：問問題、聽答案、比較經驗，最後揀最好嗰個。Sorry，唔係。面試官始終係人，佢可能覺得一個候選人「好有自信」，於是將佢嘅答案理解成能力；另一個人講同樣內容，但因為表達比較緊張，就可能被理解成「唔夠成熟」。兩個人嘅實際能力可能差唔多，但最後得到嘅評價，卻未必一樣。
其實過往面試研究亦有類似發現。早期形成嘅印象，可以影響面試官之後點樣評估候選人喺結構化面試入面嘅回答，而且呢種影響並唔一定會隨住面試進行而完全消失。呢項最新研究並唔係話「第一印象一定決定招聘結果」，亦唔係話「溝通技巧比能力更加重要」。研究本身主要係統合不同研究之間嘅關係，並唔可以單靠呢啲數據證明因果關係。
當我哋以為自己喺面試評估緊候選人嘅能力，現實情況係，我哋其實只係評估緊自己鍾唔鍾意面前呢個人。So Sad but true。
所以，對招聘人員嚟講，真正有效嘅方法唔係叫自己「唔好有第一印象」，冇可能。更加實際嘅做法，係用結構化面試、統一問題、明確評分準則，以及多位面試官獨立評分，盡量令候選人嘅第一印象唔好變成最後印象。意思唔係僵化嘅問，而係要有問題框架同方向。
所以，CV 負責入場，面試則係你如果令面試官 like 你。
記住喇。
作者：Sydney HR 的日與夜
關於作者：作者為一企業人事部職員，同時為合資格Life Coach，國際九型人格師、MBTI及DISC Advance持牌培訓師。最鍾意玩玩具同寫下嘢。現我城隕落，無比哀嘆，盼一盡綿力，將文化保存，以文會友，抒發一下。這篇文章，歡迎轉載。
