Bondi Beach 發生嘅恐怖襲擊震撼全澳洲，槍聲喺海邊迴盪，市民眼前嘅「日常安全感」瞬間粉碎。今次事件唔只係一宗公共安全事故，更拉開咗另一道傷口：喺高度緊張嘅社會氛圍之下，職場員工嘅情緒其實好脆弱。企業過往習慣一句「保持正常運作」就當交代，喺今日已經行唔通。
澳洲最大嘅心理支援機構 Lifeline 表示，事件發生後求助個案急升，情況直指社會正集體承受壓力。Lifeline Narrm CEO Carrie Leeson 指出，不少求助者形容自己「震驚、恐懼、悲傷」，亦有人話心底出現難以消散嘅不安。即使冇親身喺現場，透過傳媒和社交平台見到畫面嘅澳洲人，都一樣受到衝擊。
要知道，暴力發生喺一個熟悉嘅地方，就足以摧毀人嘅安全感。其實對香港人，呢句話更令人唏噓。喺2019反送中運動後，相信大家會好明白。可是，就算社會震盪，第二日依然要返工。於是問題來了：僱主準備好未？
近年職場講「Whole Self」，鼓勵員工帶住完整嘅自己返工，但當集體創傷發生，點樣處理員工嘅情緒？係咪仲可以一句「保持專業」就掩蓋所有問題？Lifeline 認為唔可以。佢哋觀察到，愈來愈多企業主動尋求指引，希望知道點樣支持員工，避免公司變成一個冷漠嘅空間。
有啲企業已開始做得比以前好：承認事件，唔會當無事發生，也唔要求員工「立即投入工作」。呢類做法能夠減低員工嘅孤立感，提醒大家情緒反應係正常、係人性嘅一部分。
Lifeline 建議 HR 應該採取人本做法，包括承認事件、正常化創傷反應、提供彈性安排、清晰宣傳支援渠道等。企業更應該分享可信資訊，例如應對創傷嘅指南、支援嘅方式等等，例如 EAP。簡單一句「如果你唔舒服，可以搵我哋傾」都足以成為有人獲救嘅第一步。
不只是一般員工，企業領導層都需要協助。因為喺社會不安時，員工自然會向上級尋求穩定。然而管理層同樣係人，都可能感到迷惘。HR 嘅角色因此變得更重要：提供指引、協助主管理解何時可以傾談，何時需要交由專業人士處理。
職場最重要嘅，始終係「人」。喺動盪之中，最有效嘅支持往往唔係政策，而係一句關心、一個眼神、一個肯聆聽嘅同事。「人性優先，政策其次」係新世代嘅管理模式，更指出企業如果只睇 Operation Efficiency，反而會令員工覺得自己嘅情緒被否定。
而今次事件亦提醒咗企業另一個現實：社會撕裂同偏見可能會喺職場浮現，特別係當事件牽涉宗教與身份，管理層必須立場清晰，避免任何歧視性或煽動性言論喺公司內蔓延。在慘劇過後，企業嘅每一次關心，都可以令員工感覺自己唔孤單。
總括而言，邦迪海灘恐襲對澳洲社會造成嘅衝擊唔會喺短時間消失。企業有責任讓員工身心復位，而唔係假裝世界照常運轉。香港人對「集體創傷」並不陌生，也更明白職場如果缺乏人味，只會令傷口更深。
喺呢啲時刻，一句「你還好嗎？」比任何 KPI 都更重要。
關於作者：作者為一企業人事部職員，同時為合資格Life Coach，國際九型人格師、MBTI及DISC Advance持牌培訓師。最鍾意玩玩具同寫下嘢。現我城隕落，無比哀嘆，盼一盡綿力，將文化保存，以文會友，抒發一下。這篇文章，歡迎轉載。
