【人事世界】8月份澳洲職場趨勢 – Sydney HR的日與夜

澳洲統計局（ABS）9 月中公布咗 8 月份嘅就業數據，表面上失業率維持喺 4.2%，同 7 月一樣，似乎未有太大波動。不過，如果細心拆解背後數字，就會發現勞動市場已經開始出現裂縫，全職工作崗位正急速減少，兼職崗位雖然錄得上升，但無法完全抵銷全職流失帶嚟嘅衝擊，而職缺數量下降更加係未來就業環境不容忽視嘅警號。

數據顯示，8 月澳洲就業人口淨減少大約 5,000 人。當中全職工作流失超過 41,000 個，而兼職崗位則增加大約 36,000 個。失業人數同時輕微減少約 1,000 人，令到失業率表面保持穩定。就業對人口比率由 64.1% 輕微下跌至 64.0%，而勞動參與率亦由 67.0% 回落到 66.8%，這反映出有一部分人選擇退出勞動力市場，而並非真係成功再就業。換句話講，失業率之所以冇上升，部分原因係因為有人唔再尋找工作，而唔係因為經濟創造到足夠新職位。

性別層面上，女性全職職位流失尤為嚴重，減少超過 30,000 個，而男性亦錄得大約 11,000 個全職崗位消失。雖然男女兩邊都喺兼職市場有增加，但總工時下降咗 0.4%，顯示整體勞動投入係縮水，而唔係單純崗位轉換。呢種轉變，往往代表企業信心不足，寧願聘請更多兼職以保持彈性，而唔敢長遠承諾聘請全職員工。

更加令人關注嘅係職位空缺數據。根據 ABS 嘅報告，至 8 月季度，澳洲整體空缺減少到 327,200 個，比 5 月跌咗 2.7%。當中私營企業空缺降幅最明顯，錄得 3.4% 嘅下跌，而公共部門則錄得約 2.2% 嘅輕微上升。不過按年比較，整體空缺仍然下跌 1.5%，減少咗大約 5,000 個職位。這種趨勢代表企業招聘意欲持續收縮，尤其係私營市場最受打擊。失業人數與職缺比例由 1.9 上升到 2.0，意味住每一個工作崗位後面有更多人爭奪，這正正係勞動市場放援嘅早期訊號。

因此，單單以失業率作為衡量標準，容易掩蓋實際壓力。全職崗位流失、勞動參與下降、工時減少同埋職缺收縮，都反映出市場存在結構性變化。失業率穩定，並唔代表市場健康，反而可能暗藏問題。現時企業招聘趨向保守，求職者競爭更激烈，意味著未來失業率隨時有機會上升。個人傾向預測失業率至年底維持4.1％至4.3％之間，升穿4.4％機會不大。

對於生活喺澳洲嘅香港人社群，這組數據亦有啟示。明顯地，就業環境開始越趨不穩定，單靠全職工作未必保證長遠安全，學習新技能、增加就業彈性成為必要策略。响澳洲，好多人餐飲餐食餐餐清，遇到突發失業或工時縮減會很徬徨，預留一定儲備，以應付任何可能更顯重要。最後，社群之間嘅互助，例如港人平台（OzStarter）可以提供資訊交流、職場分享同埋支援網絡，協助彼此應對環境轉變。

8 月嘅就業數據，表面穩定，實際上卻充滿挑戰。全職崗位消失、企業招聘保守、職位空缺數目下跌，都意味著勞動市場正進入一個更艱難嘅階段，未來失業率上升幾乎係肯定嘅事。

作者：Sydney HR 的日與夜

關於作者：作者為一企業人事部職員，同時為合資格Life Coach，國際九型人格師、MBTI及DISC Advance持牌培訓師。最鍾意玩玩具同寫下嘢。現我城隕落，無比哀嘆，盼一盡綿力，將文化保存，以文會友，抒發一下。這篇文章，歡迎轉載。

支持我們：https://points-media.com/supports/