上星期被邀請上了一個電台節目live show，分享對2025年澳洲職場走勢，尤其是在薪酬以及移民政策改變上，澳洲求職者需要注意嘅地方。收到邀請之後當然不敢怠慢，連日趕制咗八頁紙嘅PowerPoint送過去，訪問照住個八頁紙嘅Flow去進行，食得唔好嘥，當然要喺呢度同大家都略略分享一下。
首先當然係講吓2025年有咩行業係最Hit，最demanding 㗎啦！大家都知，唔同嘅求職網站、獵頭公司甚至評級機構等等，都會列出所謂嘅「十大職業」，而每一個十大都係唔同嘅。咁究竟邊啲職業先至真真正正係有好大需求㗎呢？為此我都做咗啲功課，喺五個唔同嘅Sector抽咗佢哋認為十大職業嘅排名，呢五個唔同嘅行業分別係網上求職平台、獵頭公司、求職諮詢服務機構、政府以及大學。有幾個職業係比較突出嘅，就係呢五間機構都同時出現，排名可能唔同，然而佢哋都係屬於十大裏面。就等我哋一齊睇睇係邊幾個職業啦：
– App and Software Programmer
– Construction Manager
– Electrician
– Register Nurse
– Cyber Security
– Age and Disabled Care Workers
– Chefs
– Childcare Workers
– General Practitioner
– Data Analyst
呢十份職業裏邊，公共服務佔咗差唔多一半，呢個都係配合返澳洲政府未來嘅人口政策，同時間人口結構嘅變化亦都促進咗呢啲行業嘅人手需求；另外隨着澳洲各大城市繼續嘅Metropolitan化，以及AI人工智能繼續嘅發展，軟件工程師、網絡安全以及數據分析亦都名列前茅。剩返嘅就係生活嘅基本，例如trade以及飲食行業，你睇到呢啲行業基礎上都係唔能夠比人工智能去取代嘅，所以如果你而家正在進修又或者考慮進修嘅話，上邊呢啲行業，喺未來五至十年都仍然有好大嘅需求同埋發展空間。
而喺職位方面，疫情已經過去咗差唔多五年，澳洲仍然係未能夠完全回復，之前因為疫情所未能招聘嘅職位仍然高達20萬個，雖然喺2024年有啲公司已經因為一直都請唔到人最後係將職位削減，疫情開始到現在仲未請到人嘅都仲有10萬個。我哋睇到呢個狀況喺2025年應該會有所改善，可惜嘅唔係好消息，隨着經濟繼續緩緩嘅下行，企業傾向唔會加聘人手，同一時間有流失亦都唔會填補空缺。好多放喺求職網站上面嘅職位都可能係虛嘅，人工亦都係一樣，所以唔好有個錯覺就係打工仔嘅人工會依然繼續坐火箭咁樣升，由於澳洲已經在引入移民、工作假期以及留學生，基層職位喺招聘上已經回復到疫情前嘅水平，招聘並不困難；高端專業人士喺澳洲一直嚟講都係缺乏嘅，呢個情況未來2025年亦都唔會改變，所以隨着GTI變天，雖然改咗名叫做NIV，暫時睇落去清單都冇乜非常大嘅驚喜，喺2025年個不穩定因素卻大大增加，因為年中大選似乎走唔甩，若然出現政黨輪替嘅話，呢個政策亦都有可能改變。
我哋返返去講人工，疫情前嘅加薪水平大約係2.6%，而去年嘅平均數係大約3.5％，通脹亦都回落至到大約2.6%水平，有理由相信工資嘅加幅趨勢會向下行，逐漸回到疫情前水平，即係話唔使諗你會有人工大幅增加，如果你留喺同一間公司嘅話，加福只會繼續下跌，最後同通脹掛鉤睇齊。
我哋下星期繼續。
關於作者：作者為一企業人事部職員，同時為合資格Life Coach，國際九型人格師、MBTI及DISC Advance持牌培訓師。最鍾意玩玩具同寫下嘢。現我城隕落，無比哀嘆，盼一盡綿力，將文化保存，以文會友，抒發一下。這篇文章，歡迎轉載。
