2025年第一次同大家見面就等我哋去討論吓「遲到」。平時返工你會幾多點去到公司呢？一般係九至五嘅開工時間，你會早半個鐘到公司？早15分鐘？定係準時九點浦頭呢？話說有一間英國提供 Online meeting software嘅公司Meeting Canary，對上千名不同年齡層的成年人進行調查，探討下佢哋對會議準時的定義。睇完呢個調查之後覺得好得意，同時間亦都好明確咁樣顯示到，唔同世代嘅人對於「準時」嘅看法。
我諗你估都估到啦，唔同世代嘅職場人對於「準時」嘅定義非常唔同，有近半Gen Z認為遲大約5至10分鐘仍算「準時」，Boomer就有七成覺得高比預定時間晚出現「零容忍」，認為這是不尊重職場的行為。睇返實際數字啦，47%的Gen Z受訪者認為，晏5至10分鐘與「準時」無異；約40%的千禧代則對晚到10分鐘表示「可以接受」；Gen X世代就只有26%人可容忍晚到10分鐘；至於Boomer更低僅僅20%接受。高達70% Boomer表示，他們完全無法接受遲到，無論是5分鐘或是10分鐘。相較之下，只有22%的Z世代年輕人擁有相同想法。
咁究竟點解世代差距會係可以話咁兩極 （bipolar）嘅呢？《Fortune》之前有一篇報道，分析Gen Z缺乏嚴格的時間觀念可能源於他們初踏入職場的時間正好是疫情時期，人人都WHF，開會就Online，陣間又有技術問題，所以永遠唔會準時；慣咗WHF 嘅Gen Z對於遲到入meeting Room俾好多人啤住嘅尷尬局面其實甚少經驗。而且新生代好多都講求工作嘅靈活性，時間準確與否，並非他們的priority。
咁澳洲職場呢？其實也很普遍。就我公司為例，新生代九點準時出現其實都幾難㗎，就算係去到一啲講到明要佢哋早少少返（例如Stock take），準時見到佢哋直頭係神跡。更加有同事講明冇可能九點返到工，由於佢喺工場工作，所以仲專登開咗個位係十點先至上班，但係條友都起碼十點半先到。Gen X就當然準時無比啦，一般都早15至20分鐘就會喺Office見到人，Boomer就更早，分分鐘個幾鐘前已經到達公司開始工作。開會一樣，你會發現新生代好多時候都會施施然咁行入嚟，就算全世界望住佢，佢都不慌不忙地坐低繼續開會，完全冇嗰種遲入嚟覺得尷尬嘅感覺。
雖然遲到呢就一定唔係Gen Z嘅特權，我哋可以籠統咁樣話係職場新鮮人嘅一個學習過程。對我嚟講，呢個反而係一個習慣嘅問題，例如你返學會唔會遲到？認唔認為返學遲到係一件需要嚴肅處理或者面對嘅事？我發現屋企嘅小朋友，對於準時返學個概念似乎同我係有啲出入嘅，佢哋認為遲到no big deal，然而我就會同佢哋講返呢個係你責任，同埋你有冇尊重學校所定立嘅規矩。我仲同佢哋講話佢老竇（即係我）喺咁多年嘅中學生涯裏邊其實從來都冇遲到過。現實係你有咗呢一個嘅諗法同習慣，你出嚟做嘢嘅時候，就會用返同一個嘅practice，好難改變。
對於僱主們嚟講，容忍當然係需要啦，同時間，我傾向係會溫馨提示佢哋要準時，如果再三遲到嘅話，輕微嘅口頭警告我認為係需要嘅，旨在係話返俾佢哋聽要守時，而唔係為咗要嚴厲懲罰佢哋。新生代們，你哋亦都要明白，公司制定咗工作時間唔係因為要有個框架規限，要明白法例同埋合約都係有訂明你上班嘅時間，而履行合約精神，係職場上一件非常緊要嘅事。
我又唔會話咁樣講係各打三十大版嘅，希望各個世代都了解大家嘅諗法，係職場上邊能夠合作無間。
關於作者：作者為一企業人事部職員，同時為合資格Life Coach，國際九型人格師、MBTI及DISC Advance持牌培訓師。最鍾意玩玩具同寫下嘢。現我城隕落，無比哀嘆，盼一盡綿力，將文化保存，以文會友，抒發一下。這篇文章，歡迎轉載。
