Z 世代打工仔開始陸續湧入職場，呢班1997至2012年出世嘅年輕人，帶住自己一套新鮮睇法、獨特嘅溝通方式，仲有一啲完全唔跟傳統規矩嘅期望。對一啲老闆嚟講，可能會覺得「咩事啊？！」，好似世界變咗。但同一時間，呢個轉變都帶嚟好多機會，逼住公司要諗吓點樣成長。
UNSW 商學院院長 Frederik Anseel 教授就話，其實唔需要太過驚訝。所謂「Z世代特質」，好多時只係反映佢哋初初踏入社會工作時，仲喺適應階段。佢話：「每一代年輕人都係咁，會有自己嘅新能量、新講法、新做事方式，因為未習慣職場，所以有摩擦。二十年前，千禧世代出嚟做嘢時都俾人嫌棄過一樣嘢。」換句話講，呢個唔係乜天翻地覆嘅新現象，而係代代如是。
最近喺Reddit上面仲有個email例子引起熱議，有位年輕員工同老闆請假，原因竟然係「我今日energy有啲off，冇咗嗰種vibe，所以要放年假。」聽落去有啲搞笑，但呢啲就係新世代最直接同個人化嘅表達方式。有啲人覺得佢唔夠專業，留言話：「寫一封正正常常嘅email咁難咩？當每個字都係法庭紀錄咁嚴肅寫咪得囉。」但換個角度睇，呢啲就係Z世代表達自己、睇重身心狀態嘅一種方式。
咁企業應該點應對呢？Anseel提醒，其實依家各行各業都缺人，尤其係澳洲，失業率低、人口又老化，所以每一個年輕人都係寶。公司無得揀，只可以諗點樣吸引佢哋，然後栽培佢哋。佢講到重點：「如果想公司繼續行落去，就要投資Z世代，即使佢哋有唔同習慣同埋期望。」
而講到工作模式，Z世代梗係最重視彈性，但教授就話，對初入行嘅後生仔女嚟講，完全remote未必係最好選擇。因為職場最重要嘅學習，往往係喺日常相處中發生。你會喺會議上聽到同事點樣處理客人問題，見到團隊點樣應對突發狀況，甚至係一齊食飯時交流，呢啲全部都係螢幕後面學唔到嘅。佢仲補充話，早期嘅工作經驗好關鍵，往往決定佢哋之後事業發展嘅速度。咁所以，靈活彈性同現場學習要點樣平衡，將會係未來企業最大嘅課題。
講到底，所謂嘅「文化」唔係公司口號，而係日常行為。點樣相處、點樣合作、點樣趕deadline，呢啲都係塑造員工專業成長嘅環境。好多時公司太過重視「話畀新人聽要點做」，但忽略咗文化同身教嘅重要。Z世代唔係要被「氹住」，而係要有人帶住佢哋經歷挑戰，幫佢哋成長，而唔係完全替佢哋擋風擋雨。
最尾Anseel一句講得好：「成功嘅企業唔係抗拒世代轉變，而係識得點樣將年輕人真正融入團隊。」對香港、澳洲甚至全球嘅公司嚟講，Z世代入場係必然，點樣同佢哋一齊走，將會決定公司未來十年嘅競爭力。
作者：Sydney HR 的日與夜
關於作者：作者為一企業人事部職員，同時為合資格Life Coach，國際九型人格師、MBTI及DISC Advance持牌培訓師。最鍾意玩玩具同寫下嘢。現我城隕落，無比哀嘆，盼一盡綿力，將文化保存，以文會友，抒發一下。這篇文章，歡迎轉載。
