本欄好似成日都只係從員工方向出發，又或者經常講招聘有幾容易或者困難，卻冇乜從做老闆嘅角度去同大家做一啲分享。冇計啦，我都係打工嘅，所以文章大部份都會站喺打工仔嘅角度。不過有咁講，話晒都會接觸到公司上層嘅決策者佢哋嘅諗法，今日就轉一轉話風，去睇下究竟點樣可以去好好嘅留住為你打拼江山嘅同事。
今年繼續面對市場人手短缺，無論係任何一個Sector都基礎上出現人手不足嘅情況。每一次有員工離職的時候，理論上人事部都會同佢哋做Exit interview，喺一個相對安全嘅情況之下，好多人都會食誠實豆沙包，老老實實咁樣同人事部分享離職嘅原因。喺澳洲綜合嘅離職原因不外乎有下邊幾個：
1. 不嫌錢多 – 依家物價飆升，人工升幅往往追唔上CPI，有人願意出多啲，當然係好大嘅誘因。呢個響一啲時薪嘅低薪工作尤其嚴重，好多時候爭一蚊兩蚊一個鐘，就已經足夠叫佢哋轉工了。所以留意住市場嘅薪酬趨勢，以及自己嘅負擔能力，對僱主嚟講非常重要。
2. 致命距離 – 喺大雪梨人多車多，朝早返工嘅時間可以因為塞車由半個鐘變成九個字，甚至一個鐘。陣間一個唔覺意如果個同事住喺新區，距離CBD唔塞車都分分鐘超過一個鐘。好多打工仔都因此希望搵一份喺屋企附近（最好半個鐘內搞掂）嘅返工地點。
3. 幹得不爽 – 呢個好睇究竟嗰個人嘅心態，因為每一個人都有唔同嘅信念，萬一係工作上出現衝突就有機會做得唔開心，跟住就會去搵工。呢個可能係其中一個大家冇乜留意嘅原因，就係員工喺工作上得唔得得到個滿足感。如果淨係要求有高嘅產出而忽略咗員工喺工作上嘅成就感，好快員工失去對工作嘅熱誠，就會考慮另謀高就。
4. 其他福利 – 在家工作（WFH），年終獎金、car allowance、長期服務獎、耐唔耐公司俾錢食返一餐半餐、聖誕派對及現金咭等等不同嘅福利，都能夠令員工願意留下來繼續為你打拼。唔好睇小呢啲小恩小惠蛇齋餅糭，有時候可能就係呢啲嘢，留住你嘅員工。
除此以外，員工都會考量自己嘅前途。正所謂好嚟好去，山水有相逢，好多時員工臨走時為咗好好睇睇，會費盡心思找個走人的理由，為免大家冇面。所以帶團隊，你得問自己，員工為乜為你賣命先？
另外，老闆也必須給員工做事的機會，賺錢的機會，成長的機會，發展的機會，才能令員工有目標感，安全感，歸屬感，成就感！千祈唔好以為呢啲口號假大空，講到尾，能否事業有成，相信都係每一個打工仔希望達到嘅目標。
雖然呢啲聽落好似好廢話，喺唔同嘅著名獵頭公司每年做嘅調查都顯示，如果企業能夠俾到員工一個非常清晰嘅職業生涯規劃，佢哋願意留低繼續同你打拼嘅機會會更高。根據最近嘅調查，頭12個月係斷定員工會否留任嘅關鍵，因為大部份嘅離職都會喺呢12個月內發生。理由都不外於上面講嗰幾個。
然後嘅一兩年就係佢哋嘅穩定期，當中員工開始尋求嘅就係事業發展嘅機會同埋能否喺工作裏邊取得成就。去到大約第三至五年，若然員工繼續留低嘅話，佢哋就可以話已經係你嘅主力人員，除非有咩重大嘅事情喺佢生命裏面發生，否則一般嚟講佢都會做落去，唔會刻意轉工。
所以做老闆嘅你，睇完會唔會考慮吓為員工設立一個晉升階梯嘅職業規劃呢？
關於作者：作者為一企業人事部職員，同時為合資格Life Coach，國際九型人格師、MBTI及DISC Advance持牌培訓師。最鍾意玩玩具同寫下嘢。現我城隕落，無比哀嘆，盼一盡綿力，將文化保存，以文會友，抒發一下。這篇文章，歡迎轉載。
支持我們：https://points-media.com/supports/
