喺澳洲做嘢，每年都會有機會加吓人工嘅，只不過呢，能否追上通脹就當然係另一回事啦。咁究竟數據話俾我哋知，工資同埋薪酬調整追逐戰，邊個係贏家呢？近日嘅數據又講咗啲乜嘢俾我哋知呢？冇辦法，成日都參與唔同嘅講座同埋年會，當然有好多唔同嘅insight可以同大家分享。今次會連埋少少嘅圖表，等大家可以更加清楚同埋了解。
首先呢就係失業率仍然低水，我哋見到係有攀升嘅趨勢啦，而家已經去到4.1%，預期去到年底係會升至4.3%，2025年有機會升至4.8%或更高。因為而家距離傳統失業率大約係4.5%到5%仍然有段距離，所以調整空間仍然非常之高。另外傳統就業率由全職為主導變成慢慢開始越來越多半職（Part Time），呢個可以話有兩個唔同嘅睇法嘅：第一個睇法就係公司未能夠提供到全職位置，但係需要人手，所以就以半職去取替；另外一個睇法就係因為市場上根本就冇全職嘅求職者，所以好多都變咗part-time，尤其是喺疫情之後，逐漸復常（由2024年初開始）我哋睇到呢個情況愈趨普遍。所以整體嚟講有機會係就業工時不足，而所謂嘅低失業率，其實可能都只係因為就業工時不足而構成嘅一個假象。
一開始提到嘅失業率，全澳截至2024年第一季大約有1.3%嘅人失業（被炒），對比起2010年到2019年嘅2%仍然為低，即係話市場仍然有機會係有0.7%嘅調整，而未來失業率起碼仲有0.7%嘅攀升。
人工方面就有啲閉翳，雖然人工係有升，但係就追唔到通脹，呢個就有少少廢話啦。只不過爭幾遠呢，你可以睇返圖表，都唔係好遠啫爭4%左右（!），即係話就算嚟緊嗰幾年加人工係能夠追得上通脹嘅話，你都要五至十年你先至能夠補償返喺過去兩年高通脹同埋低工資加幅嘅差距。亦都由於呢個原因，我哋睇到澳洲嘅工作模式亦都已經開始有改變，越來越多人係打超過一份工，個原因其實都係因為生活開始越來越高，需要更加多嘅收入。適逢我哋講緊大概係由二千年嘅5.5%升到而家接近7%，升幅大約1.5%。
根據澳洲嘅人口統計，現時人口增幅最高嘅係15到44歲，65歲以上嘅人口一對到增加，反而45歲到64歲嘅主要勞動力人口增加幅度不及其他嘅sectors，代表咗喺澳洲嘅勞動市場缺乏資深管理人員，長遠對商界會構成影響。然而由於澳洲仍然需要呢啲嘅高管係擁有一定嘅澳洲經驗，相信喺未來五到十年，空缺會仍然持續，直至35到44歲嘅人口逐漸累積澳洲經驗，先至能夠慢慢舒緩。
下個禮拜我哋會同大家繼續分析，睇吓其實喺現時澳洲嘅職場，有邊一啲嘅工作係最燙手山芋，另外有啲咩嘅工作係開始進入夕陽，我哋亦都會睇吓，究竟新來澳人士喺職場係咪真係唔夠Competition呢？定係情況已經開始逆轉？
關於作者：作者為一企業人事部職員，同時為合資格Life Coach，國際九型人格師、MBTI及DISC Advance持牌培訓師。最鍾意玩玩具同寫下嘢。現我城隕落，無比哀嘆，盼一盡綿力，將文化保存，以文會友，抒發一下。這篇文章，歡迎轉載。
