上星期同大家講過今個禮拜會討論一下大量公共職位嘅出現，是否代表經濟開始進入衰退周期呢？呢個原因係響過去兩年，根據澳洲統計局數據顯示，由2023 年 3 月至 2024 年 9 月，87% 的就業成長發生在非市場部門，主要是教育、醫療保健和公共管理，相反私人企業所創造嘅職位急劇下降。
自工黨當選以來，澳洲政府已增加了 26,000 多個新的長期公共服務職位，導致薪資自 2022 年 6 月以來增加了 23%。
咁點解會話出現大量嘅公營職位會係衰退嘅先兆呢？首先我哋要了解到，若然失業率繼續處於低水平，即係話就業率非常高，人人有工開。咁呢樣唔係應該係一件好事咩？兩睇啦，首先係當大家都有收入嘅時候，通常都會用錢用得比較疏爽，即係話冇辦法去壓制通脹。當落入咗呢一個惡性循環嘅時候，去到一個企業無法再負擔高昂嘅薪酬，面對無論係從外地輸入嘅原材料、運輸甚至營運成本嘅增加，企業就會去另外一個極端，就係開始緊縮開支，到最後就出現裁員潮。
再者，公共部門就業人數的激增使控制通膨的努力變得更加複雜，特別是因為經濟擴張抵銷咗私人市場就業放緩的影響，導致勞動力市場緊張，亦都會因此 推高了工資和物價。
問題係，一啲公共服務有機會只係短期性，例如基建又或者建造業，當計劃完結之後，工人就會再一次返到勞動市場，如嗰陣時失業率就會再次嘅攀升，除非政府不斷投入資金響基建當中，工程總有完成嘅一天。
好啦，咁如果政府喺工程完工之後再開新職位，甚至喺佢現時嘅架構裏面削減職位對於就業市場又會帶嚟咩影響呢？宏觀而家私人市場偏低嘅新職位，大量勞動力突然再次湧入市場又推高咗嗰個失業率囉，即係話無論係從邊一個角度去睇，未來嘅失業率係一定會升嘅，跟住就會走去我頭先所講嘅嗰一個嘅消費循環，落入去經濟下行嘅情況。
嚟緊好大機會四月就大選，工黨似乎呢鋪都有啲危危乎。但係唔好咁開心住喎，就算係有新政黨上場或者聯合政府，要解決上邊嗰個問題係唔容易嘅，尤其是而家受到一個咁不穩定性嘅外圍因素（即係Trump Trump）上場，大家勒緊褲頭，似乎不能避免。
關於作者：作者為一企業人事部職員，同時為合資格Life Coach，國際九型人格師、MBTI及DISC Advance持牌培訓師。最鍾意玩玩具同寫下嘢。現我城隕落，無比哀嘆，盼一盡綿力，將文化保存，以文會友，抒發一下。這篇文章，歡迎轉載。
