近期都有唔少朋友詢問我呢個問題，就係當佢哋接受咗Offer之後，萬一因為唔同嘅原因需要拒絕呢個Offer，法例上是否容許，容許嘅話，又會唔會令面試公司覺得你玩嘢呢？今日又等我哋大家一齊喺度討論吓。
近幾年相信大家都知道，澳洲係處於Employee Market嘅狀態，即係話員工嘅牌面比老細大，職場長期處於大量空缺狀態，員工相對比較容易搵到另外一份待遇較好嘅工作。喺招聘嘅時候，例如你收到一份Offer，你接受咗之後因為舊公司需要有兩至四個禮拜嘅通知期，而期間可能發生咗唔同嘅事，例如舊公司出高啲人工挽留你、又或者你搵工嘅時候遞咗唔同嘅履歷，有另外一間公司，出到一個更加吸引你嘅待遇，令你選擇另外嗰間公司而係而家簽咗約嗰間。
問題嚟喇，若然你決定放棄個Offer，有冇違法呢？答案係冇嘅，因為你並未正式於新公司上班，新公司亦都未開始出糧俾你，喺呢個情況之下，你哋兩個嘅僱傭合約係並未正式啟動，即係話你係可以選擇退出，唔繼續去履行呢個Offer，係同法律冇構成任何關係，有人會覺得唔好意思，ethically過唔到自己，咁就係個人價值觀嘅問題。老實講，就算你真係開咗工，萬一老細覺得你唔適合，都一樣會同你講拜拜手起刀落，你覺得佢會俾面你咩。僱傭合約不嬲係雙方的，正所謂莫道你在選擇人，人亦能選擇你。
另外亦都會有求職者擔心如果Accept咗Offer之後縮沙，會俾人Blacklist，從此永不錄用。咁呢個就Yes and No啦，有啲小氣嘅僱主就當然會將你放入黑名單啦，講真如果係咁嘅話你唔幫佢打工都冇乜損失。一般嚟講，尤其是喺而家呢個Market，僱主們都心裏有數，一係你就人工加碼，一係就唯有放手，都冇乜第三個選擇。就算我都試過好幾次，明明乜嘢Offer都出晒簽晒應承晒，臨返工前兩個禮拜都仍然收到電話話俾我知思前想後，都係另外一個Offer吸引啲，講句唔好意思就Pull out咗，又要重新搵過。
上邊呢個都係一般嚟講嘅僱傭合約條例，你自己喺簽約嘅時候必須要睇清楚合約裏便嘅條款，亦都有案例係員工冇睇清楚整個僱傭合約條款，而拒絕去履行一啲責任嘅時候發現合約裏便係寫咗嘅，喺呢個情況之下，員工唔履行就屬於違約。因此喺簽約時大家緊記要睇清楚尤其是係離職條款同埋保密條款。
大家了解咗上述嘅事情之後，當你搵工又或者請人嘅時候，僱傭合約就記住睇清楚又或者寫清楚，避免有任何嘅爭拗。
關於作者：作者為一企業人事部職員，同時為合資格Life Coach，國際九型人格師、MBTI及DISC Advance持牌培訓師。最鍾意玩玩具同寫下嘢。現我城隕落，無比哀嘆，盼一盡綿力，將文化保存，以文會友，抒發一下。這篇文章，歡迎轉載。
支持我們：https://points-media.com/supports/
