成日都話喺澳洲創業好難，守業更加難，小商戶喺初創嘅時候絕對面對唔少嘅壓力。喺創業嘅時候，相信大家都好希望能夠得到各方面嘅協助，下下嘢要使錢，絕對唔係理想嘅事。咁有冇辦法喺唔需要有咁大開支嘅情況之下能夠獲得喺創業時候唔同嘅協助呢？今日同你介紹嘅呢個計劃，係澳洲政府比初創企業嘅一個支援服務，可能好多人都未聽過。
我認識呢個計劃嘅原因係話說有一日我代表公司去咗其中一個 council舉辦嘅就業展覽，而坐我隔籬嘅嗰位就正正係呢個計劃嘅代表。坐得喺隔離就梗係會交流下傾吓偈啦，佢就大概同我介紹咗呢個計劃嘅由來。其實呢個計劃一開始主要嘅受眾係喺Centerlink 接受緊幫助嘅失業者，佢哋有啲可能搵咗一陣工之後決定自己創業，可以係做sole Trader，又可以係搞啲小生意。於是乎就衍生咗呢一個支援服務，希望能夠幫助呢一啲創業者可以更加順利咁樣營運自己嘅生意。直至過咗疫情，再加上越來越多海外移民嚟到，佢哋發現呢項服務應該需要擴展至不同階層，盡量去協助澳洲，搞小生意嘅商人，讓佢哋能夠得到適切嘅幫助。
呢個計劃主要涵蓋幾個唔同嘅範疇，包括:
1. Self employment Workshop
2. Small Business Coaching
3. Small Business Training
4. Business Advice
5. Business Health Check
6. Business Plan Development
最重要係呢一個計劃費用全免，由政府全額資助。身處喺新蘭威爾士省，你只需要年滿16歲，而家正在考慮又或者已經開創咗自己嘅公司，有需要喺上面嗰六個範疇尋求協助嘅話，呢個就係你最佳嘅選擇。當然啦，你必須要喺澳洲嘅PR同埋Citizen，話晒都係聯邦政府為初創企業提供嘅支援計劃，就一定要係做咗澳洲公民先至能夠享有嘅權利。
講返計劃本身，你唔需要上邊六種嘅服務全部用晒，你可以選擇適合自己嘅服務，有啲可能要求你上堂，有啲只係提供諮詢，商家可以就住佢哋自己嘅需要去進行選擇。由於呢個係一個聯邦政府嘅項目，喺其他省份，例如為省同埋昆士蘭，都會有相類似嘅公司提供呢項服務。我自己身在雪梨，咁就當然能夠知多啲有關雪梨嘅資訊啦，仲有啊，呢間公司今次幫雪梨搞嘅座談會，係用廣東話㗎，因為當中有同事係香港人嚟，識講廣東話，全個過程份外親切，而講完亦都同我表示係第一次用廣東話向咁多人去介紹有關服務，佢都好開心可以幫到香港人。
呢類型嘅服務機構其實喺各個洲份一定嘅數目，你唔係一定要揀呢間，絕對可以周圍望吓先睇吓邊間嘅服務最適合你，最緊要可以幫到大家。
如果大家有興趣嘅話，可以去以下網址獲取更加多嘅資訊：
https://www.sydneybusiness.org.au
關於作者：作者為一企業人事部職員，同時為合資格Life Coach，國際九型人格師、MBTI及DISC Advance持牌培訓師。最鍾意玩玩具同寫下嘢。現我城隕落，無比哀嘆，盼一盡綿力，將文化保存，以文會友，抒發一下。這篇文章，歡迎轉載。
