俗語有云：「做嗰行，厭嗰行」，好多朋友仔可能都深有同感。有啲人甚至會懷疑自己係咪當初揀錯咗行，但因為已經做咗一段時間，轉工或者轉行就會覺得唔抵，唯有硬住頭皮繼續頂硬上。最近有項調查發現，超過一半澳洲打工仔對自己當初嘅職業選擇感到後悔。呢個數字背後，其實反映咗啲咩問題？
講真，聽到超過一半人都後悔自己揀咗依家嘅行業，確實有啲令人擔心。不過，後悔唔等於對工作冇熱誠嘅，背後往往牽涉住好多複雜嘅心理同現實因素，例如公司管理混亂、職場文化有毒、冇晉升機會，甚至只係單純地覺得「如果當初唔係揀呢行，人生會唔會好唔同」嘅浪漫諗法。
SEEK 求職網站早前做咗個研究，結果顯示有 52% 嘅澳洲打工仔後悔自己所選嘅職業，原因包括收入唔夠、興趣改變、工作欠缺滿足感等等。雖然每個人後悔嘅理由唔同，但對企業嚟講，其實可以得出一個共通嘅啟示：如果想留住人才，就要建立一個重視員工成長、提供認同與獎勵嘅工作環境。
講到底，當員工覺得自己有發聲機會、有一定自主權，做緊一份同自己價值觀相符嘅工作，自然會有更高嘅投入感同歸屬感。可惜現實係，唔少老闆或者中高層管理人員根本冇能力去有效管理團隊，只識用錢或者壓力去推動表現，結果只會令同事對工作越做越冇動力，甚至產生倦怠。
其實最關鍵嘅，係要了解每位同事被咩所驅動：唔係個個都係為錢做嘢，有人想學嘢，有人重視成就感，有人只係想感受到自己被尊重。只要營造一個能夠滿足員工心理需要嘅職場文化，先至可以真正留到人。呢啲唔止係對基層員工適用，就算係身居高位嘅高層都未必唔會後悔自己揀嘅職業路，不過佢哋背負嘅責任更多，唔可以話走就走。
相信每個人都可能會曾經問自己：「如果當初我選擇咗第二條路，今日會唔會唔同啲呢？」其實有後悔唔緊要，最重要係點樣面對。將呢啲感受轉化成成長同學習嘅動力，就係成熟嘅表現；相反，若果一直陷入自責同懊悔，只會傷害自己嘅心理健康。
最後，如果你都曾經對自己嘅職業感到疑惑，唔使閉翳，成個職場起碼有一半人陪你。人生唔係當然唔會一帆風順直路，行錯一步唔代表行唔返轉頭，最重要係搵到一個適合自己步伐嘅方向，同埋，一個唔令你討厭星期一嘅工作。
關於作者：作者為一企業人事部職員，同時為合資格Life Coach，國際九型人格師、MBTI及DISC Advance持牌培訓師。最鍾意玩玩具同寫下嘢。現我城隕落，無比哀嘆，盼一盡綿力，將文化保存，以文會友，抒發一下。這篇文章，歡迎轉載。
