最近業界講得沸沸騰騰，其中一個熱門話題就係「用人工智能篩選招聘履歷」。究竟AI普及化，會點樣改變招聘流程？而身為人事專業，又應該點樣睇呢個轉變，點樣應對？
而家好多人都覺得，隨住人工智能嘅興起，我哋可以用AI幫手喺第一輪就篩選一大堆求職者，搵出最啱心水嘅 candidate，再跟進打電話或者安排面試。當人事部同招聘界對呢個便利工具充滿期待、興高采烈咁討論幾方便之際，其實有個潛在盲點，唔少人未必有留意，甚至可能覺得唔係問題，就係：當AI愈來愈普及，唔單止公司用AI篩人，連求職者都開始用AI幫手寫履歷。
意思即係話，整個招聘程序變成「AI對AI」，個人能力反而成為配角。好多求職者而家會用ChatGPT等工具，根據職位要求生成一份靚履歷，專門對症下藥。表面睇就 perfect，實際可能唔代表佢真實嘅能力。
你可能覺得我誇張，但現實係，我真係識唔少新一代朋友，依賴AI寫履歷，對入面寫啲乜自己都唔清楚，個閉翳位就係，一見工就穿煲。有經驗嘅面試官，唔會淨係睇履歷靚唔靚、口才夠唔夠，反而會用一啲出奇不意嘅問題、觀察求職者細節行為去睇真啲個人實力。
所以我對AI自動篩選履歷嘅做法，暫時持保留甚至反對態度。因為純粹靠keyword篩選，其實未必反映一個人真正嘅實力，仲有機會錯過一啲有料但冇刻意「迎合關鍵字」嘅人選。當然，你可以話真正啱份工嘅人應該兩邊都應付到，但現實係，有啲人單靠AI generate履歷，反而得到啲唔屬於佢嘅優勢。
咁點算？我嘅建議係：履歷一定要自己寫。唔係叫你寫完就唔理，覺得文法冇錯就掟上去，而係可以用AI去優化你自己寫出嚟嘅內容，但內容同語氣要你自己掌握，因為見工唔止係俾張靚履歷人睇，而係你要熟知你講緊咩，唔好到時俾人問幾句就口啞。
總括而言，利用AI優化履歷已經係不可逆轉嘅新趨勢，但關鍵唔係「靠AI」，而係「識用AI」。好好運用佢去幫你表達清楚自己嘅強項，而唔係用佢嚟包裝你冇嘅嘢。
作者：Sydney HR 的日與夜
關於作者：作者為一企業人事部職員，同時為合資格Life Coach，國際九型人格師、MBTI及DISC Advance持牌培訓師。最鍾意玩玩具同寫下嘢。現我城隕落，無比哀嘆，盼一盡綿力，將文化保存，以文會友，抒發一下。這篇文章，歡迎轉載。
