承蒙《香港時空》邀請，喺上週六喺雪梨 Burwood Library 舉辦咗一場講座，名為《澳洲求職攻略分享會》。其實一直以嚟我都同《香港時空》有保持聯絡，過去亦合作過幾次，所以今次可以再度攜手，實在係一種榮幸。
是次活動除咗我之外，仲有另一位來自銀行界、經驗豐富嘅講者一齊參與，陣容算得上頗有份量。我分享咗啲較為宏觀嘅職場資訊，例如澳洲失業率、職場文化同香港嘅分別、畢業生起薪趨勢等等；而另一位講者則集中講解面試技巧同履歷嘅注意事項。當日亦設有互動環節，現場參加者反應熱烈，普遍表示獲益良多。
其實澳洲職場文化相當複雜，尤其係大型企業（例如電訊、能源等 Mega Company）同中小企喺招聘流程上可以話截然不同。好多時求職者若唔了解當中分別，就好容易處處碰釘。今次我哋就從呢兩個角度出發，協助參加者更清楚唔同規模企業嘅招聘特性，從而提升應徵成功率。
講座之後有個 networking ，參加者多數都係打工仔，大家把握機會互相交流，氣氛非常融洽。令人欣喜嘅係，發現好多香港人喺澳洲唔同企業中擔任關鍵職位，雖然未必去到高層管理，但已經喺崗位上發光發熱，認真犀利。
其實香港人一向都有唔少優勢，幾十年嚟累積落嚟嘅工作文化同價值觀，更係我哋引以為傲嘅資產。要將呢份文化發揚光大，我哋需要凝聚、團結同埋願意付出。呢個唔單止係香港人面對嘅挑戰，更應該係我哋每一位香港人願意承擔嘅責任。
望返澳洲唔同族裔社群，有啲人數甚至少過我哋，但佢哋展現出嚟嘅團結同互助精神，實在值得我哋學習。有時見到佢哋能夠喺呢片土地扎根、互相扶持，我心裏都會反思：我哋香港人，又可以向佢哋學到啲乜嘢？
雪梨保守估計有超過七萬名香港人，來自唔同背景、擁有唔同專業同學歷。但我相信，無論身處邊個位置，我哋都應該擁有共同嘅香港精神。對我嚟講，縱然人微言輕，只要有機會出一分力，都係一份榮幸，更係一種肯定。
現時雪梨其實有唔少香港人組織，有啲係活躍喺社交平台上，有啲則係實體團體，例如《香港時空》、《澳港聯》新州支部、《Ozstarter 》等等。希望未來唔同團體可以加強聯繫，互相支持，凝聚力量，令我哋嘅聲音被更多人聽到。
最後，再次多謝《香港時空》嘅邀請，亦祝願各位求職者早日搵到理想嘅工作，加油！
