職場老齡化係一個近幾年呢都經常討論嘅問題，我亦都喺唔同嘅場合簡略講過。最近都去咗一啲唔同嘅Seminar同埋睇咗唔同嘅文章，佢哋都係有討論呢個問題，所以不如開個topic同大家分享吓。呢個係文字版，禮拜三呢就會喺個網上嘅聲音版度同大家講，因為文字版未必能夠完全覆蓋到我想講嘅主要原因。
首先我哋去睇睇咩叫做年紀大先啦，根據2019年喺昆士蘭政府嘅一項調查，受訪者認為年屆60就係叫做年紀大啦，整體嚟講，如果我哋再拆細啲譬如話喺現時嘅新生代，例如呢Gen Z就會認為54歲左右就已經叫做年紀大，去到千禧代，即係40歲左右嘅人，就認為56歲已經叫做年紀大。13年呢亦都有個調查其實都差唔多，受訪者認為50零歲開始呢就會覺得年紀大㗎喇，尤其是係一班年青啲嘅在職人士嚟睇；對企業嚟講呢就有啲唔同；佢哋覺得70歲或以上呢先至叫做年紀大嘅，你睇到呢係有個差距。
年紀大嘅workforce，有利亦有弊嘅，當然第一樣嘢呢就係比較穩定啦，畢竟佢哋可能已經結婚生仔，需要一份穩定嘅工作，所以相對嚟講呢跳來跳去嘅機會就冇咁高，另外就係佢哋一般呢都會返工比較準時，同埋係有耐性，呢啲當然係同佢哋喺職場浸得來有關，另外佢哋呢係會比較有計劃嘅，即係唔會無緣無故就話唔返工攞leave又或者突然之間話要放一日半日假咁諸如此類⋯⋯呢一啲就係一個叫做成熟啲嘅僱員係相對會比到公司嘅。當然更重要嘅，就係佢哋係能夠將多年來嘅職場經驗，係喺佢嘅職位上邊作出貢獻。
隨着年紀增長，你會發現出現嘅問題亦都會比年青人唔同，例如係一啲比較需要體力勞動嘅工種，佢哋可能冇咁嘅能力因為佢哋已經年紀大，罹患嚴重疾病嘅機率亦都增加。呢個係有可能令公司嘅員工保險個保費會上升，亦都有機會係因為佢哋嘅年齡而導致喺崗位出現意外嘅機會較高，而發生咗意外後面需要處理嘅事情當然會更多。
導致職場老齡化嘅原因係乜嘢呢？當然第一樣嘢就係現時喺澳洲係出現緊一個青黃不接嘅現象，就係唔夠管理層晉升，令到班其實可能年屆退休年齡嘅僱員想退休都退唔到。呢個係同個人口結構呢係有少少關係嘅，因為Gen X嘅人口係縮咗入去，即係話本身人已經唔多㗎喇，咁能夠上到位做Management亦都相對較少。
另外就係去管理一個有年紀差距嘅職場係有挑戰嘅，因為比較容易出現嘅問題係個資源未能夠好分配，而令到其中一邊會感受到被忽略，從而會轉工又或者未能夠喺工作裏面得到滿足感導致低morale。
咁點樣去處理呢個問題呢，其實一般嚟講就需要管理層先去了解或者明白上邊講緊嘅唔同影響先啦，另外要喺公司定期做assessment，睇吓究竟而家公司員工年齡嘅趨勢從而預早制定計劃，當然管理層亦都要盡量對跨年齡層作出公平嘅對待。
職場老齡化呢個趨勢係冇得避免嘅，僱主同僱員都需要了解點樣去面對呢一件事同埋採取適當嘅方法去處理，免得令到公司未能夠隨着時代嘅部份繼續進步。
關於作者：作者為一企業人事部職員，同時為合資格Life Coach，國際九型人格師、MBTI及DISC Advance持牌培訓師。最鍾意玩玩具同寫下嘢。現我城隕落，無比哀嘆，盼一盡綿力，將文化保存，以文會友，抒發一下。這篇文章，歡迎轉載。
