杜魯多Twitter玩「你問我答」變「有問無答」反對者譏諷暴君獲6千人讚好

2022年12月17日

唔少明星鍾意喺社交平台開直播同粉絲交流，亦會大玩「你問我答」。就算連烏俄戰爭，烏克蘭總統澤連斯基都不停網上更新戰況，激勵國民士氣，甚至公開要求西方國家援助。加拿大總理杜魯多都唔執輸，日前喺Twitter無預報上載一條自拍大頭短片，講到自己身為總理，臨近年尾好多傳媒訪問佢，仲有好多好問題，然後就呼籲大家有咩想問就即管問佢，結果帖文一出，唔少網民留言問問題，但佢就一個都未覆之餘，仲有大量留言叫佢辭職。

帖文發出唔夠一個鐘，就已經有6千幾個回覆，大量問題就好似當日杜魯多選總理一樣，唔少人對移民政策、選舉改革、氣候變化、難以負擔的樓價、醫療保健、退休金不足等政策問題，逐一提問。偶爾有無厘頭問題出現，例如「耶穌能否用微波爐加熱一個熱得連他自己都吃唔落的墨西哥捲餅嗎？」，當問題越來越多但仍未見杜魯多回覆網民問題後，終於有留言忍唔住問：「老友，你幾時先會答問題？」

不過杜魯多如果真係要逐一解答的話，可能比起國會質詢更難處理，不少網民反提出尖酸問題，例如「點解要俾數以億計援助烏克蘭但又任由加拿大退伍軍人自生自滅？」、「你7年以來（杜魯多任職總理時間）都未答過問題，點解此時此刻先答？」、「點解你不停借錢供應俾外國？點解你要增加國家負債？你幾時辭職？」，甚至有網民直線抽擊「點解你成個暴君咁樣？」，此留言更獲6千人讚好，讚好的不乏於去年支持貨車司機抗議運動，由於抗議運動被警方鎮壓，杜魯多一直被攻擊。