多倫多北約克「糖記甜品」以簡體中文刊登招聘廣告，註明「香港來的新移民Stream B或者暑假工 請勿擾 謝謝」，事件引起軒昂，糖記雖然在官方fb專頁道歉及解僱涉事經理。到周二（7月25日），被解僱糖記經理Nikki找上當地港人黃麗文澄清，透過fb live解釋事件，含淚向公眾鞠躬道歉；並強調糖記老闆不知情，感到很內疚、不知如何面對老闆及其他人。至於為何拒請Stream B港人，Nikki則解釋緣於不愉快的聘用經歷，「話辛苦做唔到，做兩日唔做。唔係一兩個，十幾個都係咁」。
「糖記甜品」拒請Stream B港人的招聘廣告遭受猛烈批評，該店其後在官方fb專頁發帖澄清及道歉，並解僱涉事經理Nikki；當地港人黃麗文（Fiona Wong），則去信加拿大人權委員會（Canada Human Rights Commision）指違法人權法，涉種族歧視。黃麗文周一向棱角媒體表示該招聘廣告荒謬，違反加拿大核心價值。
到周二，被解僱的糖記經理Nikki找上黃麗文，希望透過fb live解釋事件。
黃麗文強調不是要替任何人「洗白」，「每個人都有權講自己的故事，佢（指Nikki）講完，大家聽完，buy唔buy係另一回事」。
Nikki表示，今次企出來是不想糖記因為自己而損失聲譽，並稱並非針對Stream B港人，「好對唔住公司，我做咗6年，老細對我好好，全權交俾我管理店舖、請人，佢完全唔知（招聘廣告內容）；發生今次事件覺得好內疚，唔知點面對公司、老細」。她指老細也是香港人，知道近年港人移加難搵工，所以曾表示「幫得就幫」。
至於招聘廣告為何註明「香港來的新移民Stream B或者暑假工 請勿擾」，Nikki表示，「Stream B（港人）過來都會請，但跟住話辛苦做唔到，做兩日就唔做；不止我會訓練新員工，其他員工也會training，要花心機、時間、人力，但（他們）冇心做付出，似消磨時間，教緊佢哋時唔聽，講緊嘢會走去做其他野……唔係一兩個，係十幾個都係咁，否則唔會咁寫」；Nikki並強調自己沒歧視，此時黃麗文問道，有否聘請其他族裔員工，表現又如何？她表示，「他們會努力嘗試，即使有些冇記性，都會想努力做好」。
Nikki指店內以廣東話及英語為主，見客人進舖首先會說英語，「因為不知道客人來自哪裡」；被問到招聘廣告為何是簡體中文，她只稱不是只聘請講國語人士，「唔係特別拒絕香港人」。
fb live期間，Nikki稱原先不太了解Stream B是什麼，黃麗文即表示不少港人組織的活動都在糖記附近舉行，Nikki承認自己不關心政治，「只專注自己做事，冇關注係我責任，老細對香港人好著緊，好樂於幫助」。
Nikki指事發後，老闆致電其查問發生何事，「當時除咗道歉我都唔知可以做乜，老細跟主同我講『你以後唔使再返』」；她坦言至今也不知如何面對事件，「受到網上攻擊，有人電話鬧我，令我唔敢聽電話；有人add我wechat，add咗之後就鬧我然後block我，成件事對我好大打擊」。
至於被炒後有何打算，Nikki「唔敢諗」，於廣東出世、10歲便出國到阿根廷生活，懂說西班牙語、英語、廣東話、國語，曾經離婚仍要供養小朋友，她坦言前路茫茫，「我知係我錯，需要搵其他工繼續生活，或者返阿根廷生活」；黃麗文問道，若糖記請她回去會否考慮，「件事轟動全球，我唔知點面對老細、其他人，只希望大家唔好攻擊公司，公司係無辜」，言語間含淚鞠躬表示再次向公眾道歉。
對於Nikki聘請Stream B港人帶來不快經歷，黃麗文認為或屬個別事件，「我認識有香港專業人士嚟到，做貨倉、接線生，希望Nikki明白，好多人唔係咁」。
黃麗文並再次強調，每個人都有權講自己的故事，「Nikki有勇氣出來，是有誠意，願意承擔責任，希望大家慢慢消化她的說法」。
對於Nikki的說法，網民紛紛留言，「明白你有唔好嘅經歷，但都唔應該去標籤哂所有人」、「其實佢都認定咗”所有”stream b係麻煩友，浪費緊佢時間」、「踩多兩腳香港新移民，用火水救火」、「不了解、不關心香港的事，是關鍵。不然就不會踩幾條紅線：簡體字，微信，Stream B」、「其實呢個世界總會有好多人搵工係騎牛搵馬，可能佢真係咁唔好彩遇過好多香港人做做下唔做」、「人誰無過呢？既然當時人都肯改過，希望唐（糖）記老闆可以再給她一個機會吧」、「用簡體字明白嘅，你寫明唔請stream B香港人，就係歧視啦，祝你好運下份工」。
新聞來源：黃麗文facebook
