主頁 香港 港人北上惠州遊玩浴血收場 ...

港人北上惠州遊玩浴血收場 稱遭當地人突襲 手肘縫6針

有港人在惠州遇襲,需到醫院治理及報公安。

中港通關後,有港人選擇北上中國遊玩,3對夫婦一行6人早前參加大航假期的惠州2日1夜旅行團,聲稱於第2天被當地人襲擊,其中一名港人手肘被割破,浴血收場,「要即刻送去醫院止血縫咗6針,基本上第二日我哋幾個全日都係喺惠州派出所同醫院過」。他並怪責大航假期事後只賠償100元禮券,「感覺想敷衍了事」。

該名受傷港人以網名「Nam Nam」發帖稱,2月中與太太及另外兩對夫婦,一行6人參加大航假期惠州2日1夜旅行團,入住惠州雙月灣日出銀沙鹽晶酒店。

他指第一晚已出現狀況,「食自助晚餐,導遊同我哋講餐廳唔係好夠位,問我哋可唔可以同其他2個唔識嘅人,total 8個人一齊坐張6人枱,我哋當然唔想即時拒絕,好彩最後都可以安排番我哋圍內自己坐張6人枱」。

港人「Nam Nam」稱手肘被割破。(網上圖片)
傷口縫了6針。(網上圖片)

到第二天吃自助早餐,又發生同類事情,「我同另一對夫婦total 4個人被逼要同其他3個唔識嘅當地人(估計係中山人)坐埋同一張6人枱食飯,感覺逼夾」。「Nam Nam」聲稱,是他們兩對夫婦先坐下,其餘3人後來自故自坐下,「當時有反映過,但都係無人處理,咁我哋都唯有算數,諗住快快趣食完就走」。

未幾便發生事故。「Nam Nam」聲稱,其中一名陌生男子,突然爆粗狂罵他們,他聲稱沒有反擊,「由佢繼續鬧。但係佢之後越鬧越激動,突然拎起咗隻自助餐大碟一下想打落我個頭度,好彩我當時反應快,即刻用手踭擋住,如果唔係擋一擋應該唔單止入醫院咁簡單」。

港人遇襲後到公安局報案。(網上圖片)
到惠東縣第二人民醫院治理。(網上圖片)

「當時成隻碟俾佢打到碎哂,割到我手踭爆哂血,外套都爛埋,要即刻送去醫院止血縫咗6針,基本上第二日我哋幾個全日都係喺惠州派出所同醫院過」,不過「Nam Nam」並無解釋事件起因,只上載到醫院接受治療及到惠東縣公安局報案的證明,顯示報案日期為今年2月19日。

「Nam Nam」事後表示,最令他氣憤的並非遇襲受傷,而是大航假期的處理方法,「只有一句唔好意思,我哋問大航可唔可以豁免番我地第二日團費同導遊費(我哋已經畀足仲一早俾埋小費),因為我哋第二日全日都喺醫院同落口供,大航淨係話可以畀番$100 coupon我哋下次再報團用,感覺想敷衍了事……今次有命返到香港已經算係不幸中之大幸」。

新聞來源:棱角編輯部

支持我們:httpspoints-media.comsupports
支持我們:httpspoints-media.comsupports