近日，香港終於調整沿用咗差不多12年嘅最低工資。最新嘅最低工資係$40港元，以現時匯率計算折合，$7. 5澳紙唔到。大概25年前，澳洲嘅「Cash Price」，都已經去到呢個位。
咁澳洲嘅最低工資又係點計嘅呢？其實都幾襟計，因為要睇吓你做乜嘢喇。好多行業，都有Award（即係行規，係政府訂嘅）去 govern，你唔可以俾少過最低工資，否則便屬違法，告到上Fairwork 就會俾人罰得好甘。有案例係企業欠咗八萬蚊嘅工資，最後被判懲罰性罰款超過四十多萬澳元，作為警誡。
咁做僱主咪一額汗？如果最低工資成日變，咁點計算呢？因為政府每年都會調整每個行業嘅最低工資，調整大約係2 ％到3%，一個唔覺意唔記得咗咪好容易誤墮法網囉？其實又唔會嘅，因為而家澳洲基礎上都係需要使用single touch payroll，即係用嚟負責入數嘅軟件，已經連結稅局系統並先扣除其稅款，再發放給員工。其最低工資已經經過稅務局嘅系統更新，所以理應沒有問題。除非你仲係收緊現金，咁你就要自己去稅局嘅網頁報稅。
好啦，如果咁樣做嘅話係咪又係代表一定唔會出現任何唔錯呢？又唔係喎。下面同你哋分享一個可能好少人知係需要支付嘅工資。
某一些行業，若然你係處於最低工資嘅話，你攞假時（全職工作或半職工作，兼職唔計），係 eligible 額外17.5%嘅假期額外工資。即係話打個比喻你嘅時薪係$10 ，你放假嘅時候就可以攞到$11.75一個鐘。呢個叫做Leave Loading。但係若然你嘅時薪係已經達到$12 ，即係已經超過咗$11.75，咁你就唔合資格，Leave Loading 就沒有了。咁如果係$11.5呢？就要加$0.25，match到$11.75。複雜呢，死未？現實上，好多僱主而家比嘅時薪都已經超過最低工資，所以一般都唔會發生，再者，呢17.5%只係適用於你嘅annual leave，用最低工資計算嘅話其實係有限錢，一般嘅僱主都唔會點同你計較，費事自己墮入任何法律嘅麻煩。
另外，剛才提到，不同行業的最低工資不同，你需要了解你自己行業究竟係屬於邊一個Award，因為某一些嘅職位可能Crossover唔同嘅Award，例如你係裝嵌工人，但係公司又會叫你做一啲倉庫工作，做已經係兩個唔同嘅Award，最低工資亦都唔同。當然，若然你嘅時薪係高於兩個Award嘅法定最低工資，咁就冇問題，否則咗有得坳。
如果係對自己嘅收入是否符合最低工資係有懷疑嘅話，你可以去到Fairwork嘅網頁查詢。
關於作者：作者為一企業人事部職員，同時為合資格Life Coach，國際九型人格師、MBTI及DISC Advance持牌培訓師。最鍾意玩玩具同寫下嘢。現我城隕落，無比哀嘆，盼一盡綿力，將文化保存，以文會友，抒發一下。這篇文章，歡迎轉載。
