本欄已經討論過非常多次有關於工資嘅問題，咁點解仲可以繼續講，一講再講呢？因為無論提醒僱員同僱主幾多萬次都好，仍然會有公司走漏眼又或者咩原因都好啦計錯數。
今次輪到連鎖咖啡店Starbucks計錯數，涉及嘅款項達到四百五十萬 ，到最後除咗要計返晒利息同埋俾返錢受影響員工之外，更加被Fairwork罰咗十五萬 ，算係叫做放生㗎喇。今次呢四百幾萬係衰咩呢？原來係衰part-time嘅加班費。
根據法例，如果你係全職嘅full-time員工，即係你每周工作38小時嘅話，你喺嗰個禮拜返工嘅時候就可以被要求有一樣嘢叫做「合理加班」，即係話可能成個禮拜加埋做多兩個鐘左右又或者係一啲趕住交貨嘅時候開OT。咩叫做「合理加班」呢？即係話唔使補水咁解。咁當然如果你嗰個禮拜係做多咗十幾廿個鐘嘅話，呢個就當然唔合理啦，就需要超時補水，根足法例做喇。你有兩種選擇，一係就收錢，一係就儲埋當假期。而公司並唔係就咁做多一個鐘就陪一個鐘，而係去到加班嘅時候你嘅人工係1.5倍甚至兩倍，呢樣嘢你需要睇返你嗰行嘅法例點樣規定。
如果你係做part-time嘅話，就冇「合理加班」呢回事，即係話總之你一超時，就要補水。而今次Starbucks就係衰喺呢度。係咪覺得好麻煩呢！邊個叫你喺澳洲做嘢啫，就係咁㗎啦。
一般嚟講係點樣發現嘅呢？其實係真係好難發現嘅，因為好多時候所涉及嘅款項未必非常巨大，例如你嗰個禮拜只係開咗兩個鐘OT，而你嘅人工只不過係20幾蚊，兩個鐘頭都係40幾蚊，除稅後你袋袋嘅可能真係得三十幾。你兩個禮拜收一次人工嘅時候嗰30幾蚊可能只係佔你收入嘅唔夠5%，而你不嬲都收開嗰個人工就好難會留意到。好多時候係去到公司被Audit，auditor一睇個工時對比返所發出嘅工資先至會覺得唔對路，好多時候已經係發錯工資之後一段時間，要補返其實會非常麻煩，因為有機會當時嘅同事已經離職，甚至聯絡方式已經改變住址亦都唔同咗，令到該名同事冇辦法可以攞返所欠嘅酬勞。
咁你話係咪即係無良僱主克扣工資呢？我又唔會咁講嘅，好多時候越大嘅機構越容易會發生呢啲事，因為公司人數眾多，一唔俾就個個都冇，實在好難發現。你見中招嘅十居其十都係啲大公司，因為公司仔得幾條友，一睇就睇得到。通常係去到審計嘅時候又或者有一個人有一日無啦啦坐低計數先至會發覺計錯。
話口未完， 又到新南威爾斯大學中招，原因，又係冇好好keep好 record同計錯數。所以各位打工仔，每次收到糧單嘅時候，記住睇清楚條數。
關於作者：作者為一企業人事部職員，同時為合資格Life Coach，國際九型人格師、MBTI及DISC Advance持牌培訓師。最鍾意玩玩具同寫下嘢。現我城隕落，無比哀嘆，盼一盡綿力，將文化保存，以文會友，抒發一下。這篇文章，歡迎轉載。
