主頁 澳洲/亞太 【人事世界】就業市場情況u...

【人事世界】就業市場情況update - Sydney HR 的日與夜

 

呢幾日喺唔同嘅場合都有朋友詢問而家澳洲就業市場嘅情況係點樣,就不如有趁呢個機會同大家update一下。

現時澳洲嘅失業率仍然處於低水平,統計處顯示現時失業率大約只得3.4%,即係話冇乜大改變,仍然係處於全民就業嘅狀態。喺呢個情況之下搵工容易定唔容易,唔同的企業而家又面對緊乜嘢嘅景況呢?

首先我哋要知道通脹喺上個月仍然係達到6.8%,處於高水位,而且我哋仍然係屬於加息周期,剛剛又再升咗,即係話對比舊年,如果你係借咗銀行五十萬嘅話,你每年係要多供大約千三蚊,咁當然你嘅人工梗係追唔上啦,所以我預期經濟會下行,甚至有機會喺年底出現一啲銀主盤。

而企業方面,現時大部份企業採取嘅態度都係如果有同事離職,如非必要,一般都係會將離職同事嘅工作分配俾其他人,而唔會去重新招聘。企業開始緊縮開支,會用肥雞餐嘅方式去將一啲資歷比較長而高薪嘅員工引退,因為考慮到長期服務金(Long Service Leave)長遠會為公司帶來財政負擔,寧可手起刀落。我哋亦開始睇到一啲比較基層嘅工作,例如文員同埋Call Centre等等,有公司會開始成Team成Team咁樣去削減,甚至一啲IT部門,尤其是係做IT support嘅,亦有可能外判,以節省現金。

咁點解企業重仍然話係咁難請人呢?因為現時企業所請嘅人係越來越specific,即係話佢希望請返嚟嘅係一啲高技術員工,能夠最好就坐低即刻開工,唔使點教。同時間係因為本身係budget 批唔到,出唔到太多錢請人,所以個職位懸空吊住喺度。市場同時間以為現在係人才難求嘅情況,有啲人就會吊高嚟賣,開天殺價用一個比較唔現實嘅價錢,令到企業同candidate落入一個拉鋸當中;有啲公司最後願意俾多啲錢請人,然而長期對於公司嘅財務狀況並唔理想,到最後亦可能需要作出選擇。

對於我嚟講,從一個宏觀嘅薪資角度去睇,好多人都以為賺到八萬九萬係好應該閒閒哋,可能身邊好多朋友都同佢哋吹噓收入去到六位數字。然而統計處話俾我哋知個現實係,若然你嘅年薪係去到十三萬三千 ,你已經係屬於全澳洲頭10%嘅高收入人士。當然,喺雪梨墨爾本呢啲大城市,某啲比較熱門嘅工種係的確會有高人工搶人才嘅情況,同時間去到例如零售、流水線工人、甚至辦公室基礎文員、初入職會計等等呢啲基礎工作,你隨時隨地都仲係收緊最低工資。

所以我哋去總結上述嘅情況,現時澳洲嘅就業環境,並唔係話完全搵唔到嘢做,求職者係需要清楚自己擁有嘅技能,而且能夠於面試當中脫穎而出,就需要令到僱主清楚明白你嘅專長以及是否配合公司現時所需要嘅人才要求。漁翁撒網式嘅搵工方法,冇話唔得,基礎上大部份人都同你一樣,咁樣嘅話你就同佢哋一模一樣,基礎上有少少大海撈針。好多企業都係會依靠獵頭公司去幫佢哋搵工,我會話而家係進入咗Head Hunting嘅時代,而唔係Recruitment嘅時代,即係話員工係從其他企業搶返嚟,而唔係靠招聘能夠得到。

 作者:Sydney HR 的日與夜

關於作者:作者為一企業人事部職員,同時為合資格Life Coach,國際九型人格師、MBTI及DISC Advance持牌培訓師。最鍾意玩玩具同寫下嘢。現我城隕落,無比哀嘆,盼一盡綿力,將文化保存,以文會友,抒發一下。這篇文章,歡迎轉載。

支持我們:https://points-media.com/supports/