主頁 澳洲/亞太 【人事世界】-是什麼令你離...

【人事世界】-是什麼令你離開公司?(員工篇) - Sydney HR 的日與夜

 

上一篇呢講到係啲老細點樣去令到員工興意欄柵,今次想同大家分享返同事與同事之間,點解會形成Toxic文化呢?下便都係一啲我哋常見嘅例子,可以俾大家參考吓。

有朋友喺佢嗰間公司入職咗年幾兩年,整體工作環境都唔錯,同事亦都有線,大家準時返工準時放工,得閒吹吓水食個飯,其實都幾一樂也。間公司已經有幾十年嘅歷史,有啲員工更加閒閒哋做咗二、三十年。公司換咗管理層,新嘅管理層希望能夠與時並進,除咗喺整個Operation上面希望可以更加透明以外,亦都希望逐漸自動化,運用最新嘅系統,除咗減少同事嘅工作量之外,亦都能夠令到整個流程更加精準,防止有任何人為錯誤。

呢啲嘢聽落去都好似冇乜問題,並且都可以話幾common,咁會遇到咩挑戰呢?相信大家都可能估到,就係一班老員工喺整個過程當中對着幹,因為需要學習新系統,摒棄原有嘅工作模式。呢個對於佢哋嚟講係一個挑戰,一來會擔心自己會否被淘汰,二來亦都擔心自己冇嗰個嘅能力去學習新系統。於是乎就出現咗一個管理層有管理層推,下邊就繼續自我感覺良好,繼續沿用舊系統,搞到兩個系統同時進行左一段長時間,令到啲數越嚟越亂,老員工自己有一套,新來嘅就要學習新嗰套,於呢一方面經常發生不愉快事件,就算大家平時有幾風花雪月都好,一去到呢啲位就會面阻阻。

久而久之,喺公司裏便就開始出現唔同嘅派系,大家喺平時日常運作上是有不同的意見,但是互相抵觸,更加有機會暗瓦底互相指責。

呢啲就係由下而上嘅有毒文化。

咁由下而上嘅有毒文化對公司有咩影響呢?首先當然係令到新員工無所適從,應該聽前輩講嘢定係老細講嘢呢?雖然表面上應該係使用新系統,實際上原來兩個勢力都仲喺度角力當中,有好多嘢都可能swept under the carpet,爆起鑊上嚟可以好麻煩。新員工看在眼裏,兼且嘗試學習上手嘅時候諸多阻滯,到最後大不了明早另謀高就,公司就落入咗一個青黃不接嘅惡性循環,邊個入嚟邊個走。

咁係咪冇得救呢?其實又唔係嘅,因為畢竟管理層面冇做好,所以需要做嘅除咗係老員工buy in之外,就係需要令到新入職嘅同事明白面對嘅挑戰同埋管理層全力支持佢哋運用新系統。好多時候呢類型嘅改變,唔會係一時三刻就能夠處理到,我哋講緊係以年計嘅時間先至可以將呢啲嘅有毒文化逐漸清洗,因此管理層需要堅定,亦都要非常清晰嘅將未來嘅方向同員工分享,令到佢哋明白點解會有呢啲嘅改變。

無論係由上而下定係由下而上,良好的文化能夠領導產能增加,同事之間工作和諧。最重要嘅係你入職之前唔夠起碼了解一下嗰間公司嘅文化,費事入到去發現「原來係咁㗎」,到時先至發覺唔啱自己,咁就呻笨。
 作者:Sydney HR 的日與夜

關於作者:作者為一企業人事部職員,同時為合資格Life Coach,國際九型人格師、MBTI及DISC Advance持牌培訓師。最鍾意玩玩具同寫下嘢。現我城隕落,無比哀嘆,盼一盡綿力,將文化保存,以文會友,抒發一下。這篇文章,歡迎轉載。

支持我們:https://points-media.com/supports/