不論係離開咗出生嘅地方，定係大環境嘅改變，總會令人不安，產生恐懼。
不論呢啲改變係無可避免、定係人為，動盪亂世之下，喺面對恐懼嘅時候，可以點樣自處呢？
心理學上，其實恐懼都係人嘅天然自我保護屏障之一。恐懼嘅存在，本身就係人保護自己嘅自我機制，例如我哋嘅祖先面對黑暗、未知嘅環境，心理中產生恐懼，就自然唔會走入危險。無可否認，喺大自然汰弱留強之中，因着恐懼，懂得避免危險，自然個體存活率高，對恐懼嘅反應，就留喺我哋嘅基因入面，一直流傳到現代；反之，好似甘迺迪家族入邊冒險衝動嘅基因，免不了會令家族中人不約而同較多傷亡，甚至搞到引起甘迺迪詛咒呢一個社會傳說。
但恐懼本身，同過敏一樣，本身係人保護自己嘅自我機制，喺超越咗應該有嘅程度之後，反而會帶俾我哋麻煩。
恐懼本身就好容易引起心理上面嘅焦慮，總係覺得生活嘅環境唔安全，到處都係對自己不利嘅嘢。人心總係不安，成日就將好多時候花喺想像恐懼、想像點樣避免危險、想像最壞嘅打算，漸漸地喺不安嘅循環入邊困住，走唔到出嚟⋯
雖然冇人可以講得出恐懼，到底係真定係假；黑暗入邊到底係咪真係有危險。可以因循住先祖流落嚟嘅直覺，遠離危險，當然就係最好。之但係大環境難以改變，如果環境同事態係不能夠一時三刻變得更好，就要小心留意自己嘅狀況，留意自己會唔會喺恐懼嘅當前，產生過多嘅焦慮而影響自己嘅心理狀況。
如果你覺得，成日都感到好緊張，好擔心會唔會有壞事發生；甚至覺得自己成日往壞處諗，個人好負面，好難抽離，好難專心平日嘅工作，就要小心，係咪到咗應該唞吓嘅時候。
黑暗當前，除咗遠離呢個環境，有同行者分擔，有群眾嘅力量，面對恐懼，手挽手，大家都不孤單。記得有事要同身邊嘅人共同渡過：好事要分享，壞事同樣要分擔。一個人難過，點都比不上一班人一齊難過。一齊苦中作樂，大家加油！
—
2024嘅細粒姑挑戰新corner！
細粒姑娘嘅隨筆噏
精神唔再係講病，而係點樣達至精神健康
每一期，兩個字做標題
可以係某一個階段
可以係某一個徵狀
希望可以及時補充你嘅能量
繼續喺異地撐住你嘅香港人生
#細粒姑講吓經 #移民精神健康 #揸車
