主頁 香港 【專訪文字版】解思念之情 ...

【專訪文字版】解思念之情 慰港人心靈⎜RubberBand 帶着祝福到英國

成軍16年,RubberBand將於本月底舉行首次大型世界巡迴音樂會,首站正正選在近2年有多達十數萬香港人移居的英國,分別在倫敦OVO Arena Wembley及曼徹斯特AO Arena Manchester演出,兩個會場均可容納逾萬人,其後會轉到德國柏林及荷蘭阿姆斯特丹。

RubberBand前年推出一曲《Ciao》並在紅館舉行《RubberBand Ciao 2021》音樂會,為到外地展開新生活的香港人送行,約定大家未來再見。今次「找數」,巡唱更以《Ciao》為名,實行在外地跟香港人團聚。低音結他手阿偉說:「 好開心,今次喺一個咁有規模嘅地方做騷,亦都係我哋嘅心願,自從我哋2021年開完紅館音樂會,其實一直都好想帶呢個騷去其他地方同大家見面,特別係英國,因為呢2年好多朋友移民咗去嗰度生活,好想借呢個機會同大家相聚番一晚。」鼓手泥鯭則透露對樂迷朋友的思念,是促成他們決定舉行巡迴騷的動力:「 其實佢哋思鄉之餘,我哋作為朋友都會掛住佢哋嘛。」主音6號就希望做好表演:「大家安排到就嚟囉,其實去到嗰刻大家見面,我哋起歌,下面嘅人跟住唱,好enjoy我哋嘅音樂,我覺得已經足夠。」

「說了再見,約定再見,就會再見」,對於今次兌現承諾飄洋過海跟樂迷朋友見面,6號為人比較感性,他坦言情緒複雜,雖然不捨,但希望大家在外地生活安好,所以今次帶着無限祝福送給每一位朋友,而近年創作的《好好地過》、《這刻我們》2支歌正好記載自己面對離別,心情的轉變。「我面對離別係唔叻嘅,即使牛高馬大成40歲,去赤臘角送同學仔機,其實一攬住就講唔到嘢。所以自己都好驚,見到佢哋嚟睇嘅時候,我但求唔會喺台上面太過失儀,或者俾個情緒影響到,因為嗰種情緒係好複雜,即係終於見到你哋喇,但只要你哋生活好,我就開心囉。《這刻我們》有一句歌詞係『誰都選對了路線』,所以我帶咗個祝福嚟開呢個音樂會,尤其英國呢2場。」阿偉就希望感受得到香港人之間互相關顧的情懷:「好想係大家拍一拍膊頭嗰種感覺,即係互相問好,然後話俾對方聽我哋都過得好好,因為我覺得個關係唔係純粹一個歌者同一個歌迷咁簡單,係香港人嗰種關係,即係大家一齊喺呢個地方成長,好多嘢都會明白,雖然可能已經去咗另一度生活,但係嗰個明白好緊要。」至於泥鯭最想藉着歌曲,勾起大家的集體回憶,慰藉一班離鄉別井的香港人心靈:「我哋喺唔同地方將我哋嘅歌唱出嚟,其實係一個好好嘅方法令掛住呢個地方嘅人可以得到慰藉。」

將與英國樂手同台演出

RubberBand有個心願,將2021年的《Ciao》音樂會帶到英國,不過將大型音樂會移師海外並非易事,問到今次巡迴騷跟前年的香港紅館騷有何不同?6號說:「《Ciao》音樂會其實有個好重嘅元素就係同管樂手合作,但礙於成本控制,未必能夠喺香港請佢哋一齊過去,不過我哋嘅音樂總監Patrick Lui(雷柏熹)喺爵士界好多network,佢喺英國幫我哋line up咗一啲英國樂手,想盡量將件事呈現番俾英國冇睇過呢個騷嘅朋友睇番,所以呢part繼續keep番,只不過玩嘅人唔同,但佢哋都係喺英國當地好出色嘅樂手。」泥鯭亦說:「雖然個騷都係《Ciao》做牌頭,但我哋係過去同佢哋重聚、re-union嘅感覺。香港嗰個騷,我哋係面對一班要離開或者準備離開香港嘅朋友,今次我哋去到,佢哋已經係一班適應咗新生活或者開展咗新生活嘅朋友,咁已經好唔同;其次係我哋呢23年其實都有做新歌,我哋都想將呢啲元素擺番落去俾觀眾朋友,所以必定會有唔同嘅地方。」

帶來「音樂菠蘿包」帶來香港

奮鬥16年,終於衝出香港,面向世界,RubberBand計劃將巡唱帶到更多地方,並將整個巡演過程拍成紀錄片,紀念一個成就的里程碑。問到最想紀錄甚麼?6號滿心期待地說:「我覺得我哋奮鬥咗咁多年,終於做到呢件事,其實心情係點呢?以前去台灣出席一啲音樂節,或者2019年機緣巧合之下去咗慕尼黑參加summer音樂節,都係好短嘅45分鐘唱晒一set歌;但今次係掛住RubberBand個牌頭,成個騷屬於自己嘅,夾band嘅人真係好憧憬tour嘅每一件事,穿州過省站過站,中間搭船、搭火車或者搭飛機去另一個站,呢啲我哋全部冇經歷過,去到依家呢個年紀先至體會,可能有啲人覺得係遲咗啲,但我自己覺得時間啱啱好,呢種狀態我好想紀錄咗佢,可能夜人靜大家對住個cam或者捉嚟傾吓偈,其實都係一件我好珍重嘅事。另外就係呢幾年移咗民嘅朋友,或者有啲移咗民好耐嘅老香港,見到佢哋又係點樣呢?我哋係咪好似『音樂嘅菠蘿包』或者『音樂嘅牛腩河』咁樣?即係我哋係啲好香港嘅嘢,但係佢哋好耐冇品嘗過,好似啱啱完成咗英國tour嘅樂隊ToNick主音恆仔講,佢好似已經將香港帶咗嚟嗰個表演場地。如果資源許可,訪問埋一啲有嚟睇嘅觀眾,其實都開心嘅,我覺得就係音樂讓我哋連繫埋一齊,其實好多嘢都可以紀錄。」

棱角編輯部

支持我們:https://points-media.com/supports/