先別誤會，我唔係講緊人工呀吓 ，因為我哋會一齊去睇吓，喺工作嘅待遇或者要求上，員工同埋僱主大家嘅期望會有啲乜嘢分別。今日我哋還原基本步，睇一睇員工同埋僱主對工作環境、以及職場文化嘅分別。
呢個係根據其中一間國際人力資源機構喺最近所做嘅問卷調查所得出嘅數據，佢哋總共全球調查咗超過50,000名在職人士，澳洲佔大約5%，所以整體我哋可以話都喺統計學上有代表性。就等我哋一齊睇睇，呢一個調查講咗啲乜嘢俾我哋知。
首先講求職者，佢哋最重要嘅當然係睇工資啦，跟住就係睇吓工作嘅彈性、工作地點、公司文化、成就感、公司嘅價值觀、管理層、培訓、升遷以及最好係四天工作。
咁僱主呢？佢哋認為能夠吸引員工首先梗係工資啦，跟住就係有在家工作嘅安排、公司文化、彈性嘅上班時間、有清晰嘅升遷計劃、公司嘅地點、管理層、成就感、額外酬金，最後就係公司嘅價值觀。
其實呢十樣嘢好多都相似，只係嗰個排序呢就有啲分別。呢一方面呢僱員同埋僱主呢有相同嘅共識但係有唔同排序。即係話作為求職者，喺搵工嘅時候你期望所得到嘅，同僱主認為重要嘅係可能有優次嘅出入，例如工作地點對於僱主嚟講係排到第六，員工就排到第三。喺澳洲工作地點非常緊要尤其是喺兩個大城市，因為交通擠塞，朝頭早返工嘅時候半個鐘嘅車程可以變成一個鐘甚至更多，所以工作地點近屋企呢，會成為求職者其中一個好重要嘅條件。另外對求職者嚟講，公司能否提供足夠嘅在職培訓很重要，但係僱主就冇納入呢一樣嘢成為佢哋喺招聘時候着重嘅地方。畢竟，在職培訓意味着喺當下嘅Productivity會減低，因為時間花咗培訓呀嘛，尤其是而家經濟開始下行嘅時候，對僱主嚟講在職培訓難免成為一個負擔。
轉一轉鏡頭，我哋睇吓點樣去挽留員工。對員工嚟講，佢哋離開公司又或者去尋找新機遇嘅原因首先當然係對於份糧唔滿意啦，另外就係睇唔到任何升遷嘅機會、對現時工作不滿、對公司方向唔認同、文化唔適應、不同意價值觀、培訓不足、影響私人生活、或者想嘗試新嘅行業都係佢哋離職嘅原因。
咁僱主各方面佢哋認為邊幾樣嘢能夠挽留到員工呢？首選當然就係要調整佢哋嘅薪水啦，另外係能夠讓到佢哋盡量做到work life balance、同經理或者管理層有好嘅關係、給予機會佢哋升遷、良好嘅管理模式、以唔同嘅方式向員工表達謝意、提供彈性工作安排、俾到工作安全感等等。
就住呢幾方面嚟睇，僱主所採取嘅行動，似乎大部份都能夠回應到員工嘅不滿。
另外有一項幾特別嘅數據，就係全球大概有一半嘅員工認為如果升職同埋加薪會影響到佢哋個整體工作嘅Wellbeing，佢寧願唔升。澳洲呢？竟然超過60%，即係話佢寧願要有好嘅職場精神健康，都唔要升職加薪。另外亦都有66%嘅人表示假如升遷係會影響到家庭關係嘅都會選擇係唔接受，尤其是係高層員工，若然繼續升職會對佢哋職場精神健康有影響，差唔多七成都唔願意升遷。
對於彈性上班呢一個安排，就更加睇到老闆（或者高層員工），同埋一啲初級員工分別。老闆們認為彈性工作安排對佢哋非常重要，但係對佢哋條Team呢就唔多重要喇。呢個係典型嘅Double Standard，鬼叫佢出糧俾你咩。咁員工係咪要硬食呢？睇怕都係。
我哋下週繼續討論。
關於作者：作者為一企業人事部職員，同時為合資格Life Coach，國際九型人格師、MBTI及DISC Advance持牌培訓師。最鍾意玩玩具同寫下嘢。現我城隕落，無比哀嘆，盼一盡綿力，將文化保存，以文會友，抒發一下。這篇文章，歡迎轉載。
