【人事世界】澳洲4.5% 失業率背後 – Sydney HR的日與夜

統計處釋出 4 月失業率為 4.5%，創下自 2021 年以來新高。消息一出，市場即時震動，媒體亦迅速將焦點放喺「失業率上升」同「經濟放緩」之上。不過，如果單純只睇 headline number，其實好容易錯過勞動市場真正正在發生嘅變化。

過去幾個月，我一直提到一個觀點：澳洲勞動市場並唔係突然「崩潰」，而係正進入一個慢慢轉向、更保守、更重成本控制嘅階段。今次 ABS 最新數據，其實正好進一步印證呢個趨勢。

因為真正值得關注嘅，從來唔只係失業率本身，而係失業率背後幾個更重要嘅訊號：

• 企業開始用更少人做更多工
• 初級職位持續收縮
• 女性就業開始轉弱
• 勞動市場正由「人才短缺」慢慢轉向「隱性裁員」

根據 ABS 數據，澳洲 4 月就業人口減少 18,600 人，遠差過市場原本預期增加約 15,000 人；失業人口則增加超過 33,000 人，令失業率由 4.3% 升至 4.5%。同時，勞動參與率由 66.8% 微跌至 66.7%。

如果只睇表面，呢個似乎係典型經濟放緩下嘅就業數據轉差。但更值得注意嘅，係另一組幾乎冇乜主流媒體深入分析嘅數據：總工作時數（hours worked）其實上升咗。

ABS 顯示，4 月總工時增加約 1,600 萬小時，按月升 0.8%，按年升 3.5%。換句話講，澳洲企業而家正出現一個非常重要嘅現象：更少員工，但做嘢多咗。呢個現象喺 HR 同勞動市場分析裡面有一個名稱，叫 labour intensification（勞動強化）。

企業唔一定大規模裁員，但會透過凍結招聘、自然流失後唔補人、減少初級職位、壓縮 headcount，然後將更多工作量集中喺剩低員工身上。對企業短期財務而言，呢種做法非常吸引，因為人工成本即時下降，生產力數字表面上甚至可能更好睇。

但問題係，呢種模式通常有時間限制。

近年澳洲 burnout 問題本身已經相當嚴重。多份 HR 調查顯示，澳洲員工壓力水平已經係亞太區最高之一，而 HR 從業員本身亦大量考慮離開行業。當企業長期要求員工「做多啲、撐耐啲、頂住先」，短期可能有效，但長遠自然會演變成 disengagement、士氣下降同核心人才流失。

而且，今次數據另一個值得警惕嘅地方，係青年失業率。

4 月青年失業率升至 11.1%，超過整體失業率兩倍以上，亦係今次數據升幅最大部分。如果放喺十年前，可能仲可以簡單理解為經濟周期問題——經濟差，年輕人自然最先受影響。但而家情況已經冇咁簡單。

上星期已經講過，近年生成式 AI 同自動化工具快速普及，企業開始減少大量初級、例行性工作崗位。尤其行政、分析支援、文書、初級 marketing 等工作，正逐步被 AI 工具吸收。問題係，今日被削減嘅唔單止係一份 junior job，而係未來十年整個人才供應鏈。

對澳洲而言，呢種情況長遠可能導致一個相當危險嘅結果，就係未來中層同專業人才供應斷層。

另外，女性就業數據同樣值得特別關注。4 月女性失業率上升 0.4 個百分點至 4.4%，升幅係男性四倍；女性勞動參與率同就業人口比例亦同步下跌。呢個趨勢其實同過去幾年澳洲職場一直存在嘅結構問題一致。女性更集中於兼職、casual、零售、服務業等較容易受經濟波動影響嘅工作，同時亦較多承擔家庭照顧責任。換句話講，當企業開始削減成本，最先被影響嘅，往往正正係女性比例最高嗰類工作安排。

過去幾年，唔少企業投入大量資源去推動 gender equity、女性參與率同薪酬公平，但當經濟轉弱，如果成本控制開始集中落喺兼職、彈性工作同 casual arrangement 上，過去建立嘅成果其實可以好快被侵蝕。

今次數據裡面唯一比較正面嘅部分，係 underemployment rate（就業不足率）微跌至 5.8%。呢代表部分原本「有工但工時不足」嘅員工，而家獲得更多工作時間。從企業角度睇，市場其實仍然存在一批未被完全利用嘅勞動力。值得留意嘅係，underemployment 下跌，某程度上亦同前面提到嘅 labour intensification 有關，即係剩低員工開始接收更多工時。

綜合整體數據，其實澳洲勞動市場而家最值得擔心嘅，並唔係失業率升到 4.5%。

喺過去兩年，市場主旋律一直係「請唔到人」、「人才短缺」、「工資壓力」。但而家，愈來愈多企業開始進入另一種模式：

• freeze hiring
• 壓縮 headcount
• 提高 productivity expectation
• 用 AI 減少 junior roles
• 將更多工作集中喺核心員工身上

呢種轉變，未必會即時造成大規模裁員，但已改變整個澳洲職場生態。

所以，如果話過去幾個月嘅數據係警號，今次 4.5% 失業率，某程度上就係一個確認：澳洲勞動市場，已經正式由「過熱」開始進入「降溫」階段。

問題只係，呢個降溫最後會係軟著陸，定係演變成更深層次嘅結構問題。

作者：Sydney HR 的日與夜

關於作者：作者為一企業人事部職員，同時為合資格Life Coach，國際九型人格師、MBTI及DISC Advance持牌培訓師。最鍾意玩玩具同寫下嘢。現我城隕落，無比哀嘆，盼一盡綿力，將文化保存，以文會友，抒發一下。這篇文章，歡迎轉載。

支持我們：https://points-media.com/supports/