主頁 澳洲/亞太 【人事世界】澳洲創業真困難...

【人事世界】澳洲創業真困難?- Sydney HR 的日與夜

呢排唔同嘅企業接二連三都係因為工資嘅問題見報,有啲甚至被施以罰款。作為中小企,究竟喺澳洲創業係咪真係咁困難,係咪真係蝕硬?有網友就住呢件事向我問意見,咁我又喺下面有少少分享啦,當然我並唔係嗰啲咩創業專家,話晒都係職場咁多年,亦都見過唔少人創業(包括自己),所以都有得啲事情可以同大家share嘅。

首先大家唔使咁悲嘅,澳洲其實係有非常之多嘅中小企,亦都有好多sole trader。你亦都唔難發現,好多嘅尤其是係零售舖頭,佢哋都會起用自己屋企人啦,又或者係好年輕嘅售貨員。原因都幾簡單嘅,如果係一家人自己營運,你就當然冇咗嗰個員工嘅開支啦,而你用嗰啲年紀輕嘅,亦都係喺工資方面可以節省。呢類型嘅家庭式營運就冇乜規矩可言㗎喇,你唔使旨意佢會有幾完善嘅制度,甚至加人工、薪酬標準等等都一定唔會係跟住個市。

咁有冇啲係會唔聽話唔跟政府嘅規定呢?我話俾你聽冇就梗係呃你啦,有時候一個願打一個願捱,並唔係話呢件事係做得正確,亦都唔鼓勵,喺我所認知唔同嘅行業上面,都會出現呢個嘅情況。要留意嘅係,萬一被舉報嘅話,之前都講過好多次㗎喇,係會有罰款嘅。

所以點解我哋作為人事嘅,會成日提醒身邊嘅朋友一定要了解自己嘅勞工權益,最少係一啲基本嘅規範裏邊,僱主係有嚴格執行。例如標準工時、假期甚至合同等等⋯⋯ 雖然人事並唔係百科全書,一啲基礎嘅法規我哋點都會知道,所以有時候見到啲朋友喺創業上邊有人事嘅問題都會幫吓手,無謂佢哋一陣間中咗招自己都未必知。

喺澳洲最棹忌嘅就係你滿腔熱誠諗住創業,然後就心口掛住個勇字衝出去。如果你係用呢個mind set嘅話,十居其十你死硬。記住,記住,再記住(重要嘅嘢講三次),人力資源成本,你必須計得好清楚,你要預留俾人工嘅資金亦都需要足夠,千祈唔好諗住留少少,創業有錢賺就冇問題 cover到,要知道喺澳洲其實都係新屎坑,有任何新舖頭點都會hit一陣,如果嗰陣時你以為自己賺好多胡亂揮霍嘅話,好快你就會承受後果。如果唔係點解咁多人同你講喺澳洲打工好過做老闆啦!

澳洲其實都係一個識人好過識字嘅地方,喺任何創業之前,最好就係識返一班能夠俾到意見你嘅人。尤其是一啲老行尊,因為佢哋基礎上都唔會點你。

嚟到澳洲創業,計算代價呢一部份千祈唔好睇小,因為隨時成為你能能夠成功嘅關鍵。

作者:Sydney HR 的日與夜

關於作者:作者為一企業人事部職員,同時為合資格Life Coach,國際九型人格師、MBTI及DISC Advance持牌培訓師。最鍾意玩玩具同寫下嘢。現我城隕落,無比哀嘆,盼一盡綿力,將文化保存,以文會友,抒發一下。這篇文章,歡迎轉載。