相信每一位打工仔都好希望每年都有人工加，對於收緊最低工資嘅朋友，每一年當然都好想知道究竟Award會加幾多，因為喺澳洲，基礎上Fair Work每一年都會因應通脹同埋市場情況去調整最低工資。今年Fair Work完成年度工資審查後，正式宣佈全國最低工資將會由 2025 年 7 月 1 日起上調 3.5%。呢次調整影響範圍廣泛，預計約 290 萬名依賴 Modern Award 薪酬條款嘅低薪打工仔會係下個月起睇到工資單上實際加咗錢。
呢個決定並唔係突然，係源自過去四年持續高通脹所造成嘅實質收入損失。委員會指出：「依賴Modern Awards薪酬維生嘅員工，生活成本受到極大壓力，愈來愈難應付每日所需。」尤其對低薪工人嚟講，近年實質工資下跌嘅速度，遠超過收入增幅，令到「搵夠食」變得越嚟越困難。
幸好，好消息係，澳洲儲備銀行確認通脹已回落至 2% 至 3% 嘅目標區間，代表「高通脹時代」暫時算係告一段落。委員會表示，正正因為通脹壓力減退，今次就係一個重要機會，要為打工仔補番過去幾年跑輸大市嘅實質工資。
Fair Work更警告，如果唔趁今年作出適度調整，「實質工資下跌嘅結果就會變成制度上嘅既定事實」，令最低工資同整個 Modern Award 制度長期停留喺唔合理嘅低位，直接拉低整個基層社會嘅生活質素。
事實上，澳洲政府一直支持為工人爭取「實質加薪」。阿爾巴尼斯政府喺財政預算中預測，今年通脹率會係 2.5%，而 2025/26 年會升到 3%。以呢個通脹趨勢嚟睇，加薪 3.5% 唔算過火，係屬於一個「經濟上可持續」嘅合理升幅。
不過當然唔係每個人都滿意。澳洲工會理事會（ACTU）認為，真正體現實質補償嘅加幅應該係 4.5%（即每星期加約 41.22 澳元）。但呢個要求最終冇被接受。另一方面，代表僱主嘅商會團體普遍反對過高加幅。澳洲商會只支持加 2.5%，澳洲餐廳與咖啡店協會（ARCA）更加話，佢哋嘅會員「無法吸收人工上漲，除非將價格加上去」。咁就變相又會推高消費者負擔，無限輪迴。
Fair Work喺今次審查中亦重申，會繼續針對性別不平等嘅薪酬問題作出改革。佢哋表示會檢討部分 Modern Award 嘅工種分類，矯正因性別而造成嘅工資低估，確保女性勞工享有「同工同酬」權利。
整體嚟講，今次最低工資調整對於基層勞工嚟講絕對係一個福音，代表社會對「維持基本生活水平」重新作出肯定。當然，工資增長需要平衡企業營運能力與員工生活質素，唔可以一刀切，但喺經濟逐步穩定、通脹見頂嘅大環境下，呢次加幅可以話係一個既實際又合時嘅選擇。
無論你係僱主、HR，定係普通打工仔，都值得留意呢項變化，了解自己所屬Award嘅新薪酬標準，以及未來可能延伸嘅影響。
關於作者：作者為一企業人事部職員，同時為合資格Life Coach，國際九型人格師、MBTI及DISC Advance持牌培訓師。最鍾意玩玩具同寫下嘢。現我城隕落，無比哀嘆，盼一盡綿力，將文化保存，以文會友，抒發一下。這篇文章，歡迎轉載。
