八月份嘅澳洲職場統計數據喺9月19日由統計處釋出，失業率維持4.2%，符合市場預期。隨着各國央行開始減息，雖然有傳澳洲儲備銀行或會反其道而行加息¼厘，因現時仍然超過3%嘅通脹數字令澳洲儲備銀行十五十六，唔知應唔應該減息定係加息好。文章出街時，儲備銀行決定維持利率不變，仍然4.34厘，繼續橫行。
現時就業市場開始呈現疲態，就業不足率上升，因為有職位受市場下調影響而變成半職或導致開工不足，呢個情況預計會於未來幾個月仍然持續。相比去年同期，就業不足率卻有舒緩狀況，微升0.1%。
還有幾星期就踏入第四季，即係市場最暢旺嘅幾個月，嚟緊包括有萬聖節、聖誕節以及黑色星期五大減價等等嘅促銷活動，就業市場一般會由而家就開始聘請大量臨時工，以應付第四季度嘅需求。傳統行業例如零售、餐飲、速遞，以及酒店旅遊業等等都會招聘人手以滿足假日時的需求。由於零售市道仍受加息環境直接影響，相對疲弱，預期今年第四季嘅消費，有機會冇過去幾年咁強勁。
政府已經決意要喺移民同埋留學生開刀落閘，數字會繼續減少，面對越趨疲弱嘅就業市場，呢個舉動無擬係能夠令到外來競爭者遞減，但同時呢班人嘅資歷卻比過往可能更高，更有競爭力。本地求職者所面對嘅壓力就會相對提高，求職時候需要對自己present嘅履歷更為謹慎，必須更加認清自己未來發展方向以及所面對嘅風險，才能夠有更好準備。
關於作者：作者為一企業人事部職員，同時為合資格Life Coach，國際九型人格師、MBTI及DISC Advance持牌培訓師。最鍾意玩玩具同寫下嘢。現我城隕落，無比哀嘆，盼一盡綿力，將文化保存，以文會友，抒發一下。這篇文章，歡迎轉載。
