主頁 澳洲/亞太 重口味「Shoey」 澳洲...

重口味「Shoey」 澳洲掀起用鞋飲酒熱潮

賽車手Daniel Ricciardo以Shoey慶祝勝利                                                     (圖Planet F1)

一提起澳洲嘅特色,大家通常會最先諗到咩? 大家可能會諗起澳洲三寶,即係烏蠅,肥婆,醉酒佬。不過近年,澳洲就掀起咗一種名為「Shoey」嘅重口味飲酒熱潮,相信可以成為澳洲另類特色。

Shoey到底係咩?

顧名思義,Shoey其實就係將酒倒入隻鞋,然後一飲而盡。另外有部分人覺得,Shoey嘅精髓之一,就係飲個陣一定要俾啲酒順住條頸咁流落嚟。大概係因為咁樣可以更加突顯澳洲人嘅狂野不羈。

Shoey嘅起源

關於Shoey嘅起源,坊間眾說紛紜。其中一個講法提到依種文化起源於1902年,美國一間名為Everleigh嘅俱樂部入面,當時普魯士亨利親王嘅一名隨從隨手拎咗舞女跌咗喺地下嘅鞋嚟飲香檳。

澳洲可能唔係Shoey發源地,但就好可能係最熱衷用Shoey飲酒嘅地方。2015年,賽車手David Reynolds就為咗慶祝賽事勝利而即場表演以Shoey方式飲酒。但講到Shoey文化推廣嘅功臣,一級方程式賽車手Daniel Ricciardo就當之無愧。只要佢每次登上頒獎台,佢都會用Shoey嚟慶祝,自始Shoey文化就帶入咗賽車比賽。

慢慢Shoey就已經變成咗澳洲流行文化嘅一部分。不論喺各項運動、音樂會、演唱會,你都經常會見到「佢」嘅身影。相信喺日後有人問起澳洲有咩特色文化,大家最先諗到嘅可能會係Shoey呢種重口味嘅飲酒方式。

新聞來源: DMARGE