宏福火災之後，真係有好多唔同嘅情緒同意見，但喺而家呢個香港要諗好多唔同嘅考慮。我一開始都婉拒咗十幾個媒體訪問，但認真思考之後，總有啲嘢想直接同大家講一講。以下係我對宏福街坊依家情況嘅觀察，引申出自己一啲觀點，如果大家有嘢想講，歡迎喺下面留言一齊討論。
[街坊面臨嘅實際困難]
依家街坊去咗唔同嘅過渡性房屋到暫住，但係大多數位置都比較偏遠，後生嘅街坊需要預多一段時間翻放工等，而好多老人家都仲係要喺大埔覆診，或者習慣咗喺大埔嘅生活。不過，依家唔係全部地方都有全日嘅公共交通工具來往大埔同佢哋暫住嘅地方，或者，有啲仲要轉車幾轉先返到大埔。
街坊有唔同嘅資助同申請嘅計劃，但係情況都好唔一致，有啲開始收到支票，有啲係未開始，有啲街坊家居保險都開始claim，但問題又一大堆，其實一般市民都唔識點去處理。加上，好多時一有新嘅政策，街坊都係聽完新聞嘅官員講一兩句，之後好多詳情都要等到「一戶一社工」再同佢哋解釋，甚至要上網search先知究竟係咩一回事。但係一聽完官員講其實街坊都會變得好心急，又驚住會朝令夕改，而個「一戶一社工」聽完公布之後又要等一大段時間先有正式指引喺手去解釋，中間呢段時間，街坊都唔知問邊個先可以解答到個問題。
而政府依家除咗「一戶一社工」之外，我唔太覺有一個統籌嘅部門，去將民間或政府唔同部門嘅資訊整合埋一齊，更加缺少一個可以真正做到「上令下行、下情上達」嘅角色，畀街坊可以有一個統一嘅方法查詢所有資訊，同埋表達意見。街坊好多時只可以當「一戶一社工」去做呢個工作，但並唔係「一社工一戶」，現實啲嚟講，一個社工要跟咁多家庭，根本無可能做到所有嘢，跟得曬啲申請已經好難。
[中期層面：規劃未來與尋求真相]
街坊都希望可以知道依家暫住地方可以住到幾耐，先唔評論收租金呢部份，但有啲青年宿舍同某幾個過渡性房屋聽講將來會完約，甚至重建。喺呢個情況底下，街坊可以喺嗰個地方暫住幾耐？「冇人知」，幾時要搬？「冇人知」，佢哋甚至連未來都唔敢計劃，可以問邊個？「唔知」，可唔可以聽高官嘅承諾？「唔知」。大家只可以寄望遲早會有一個清晰、肯定嘅交代。
另外，有唔少嘅街坊都希望可以搵到呢次人禍嘅真相，至少要有一個時間表或者方向，講清楚調查會點樣進行、會處理啲咩。但而家聽到嘅，都仲係「唔知」。有記者問我，「你覺得調查委員會或執法機構可唔可以還原真相，追究責任，同埋，反映呢次人禍背後嘅唔同制度嘅漏洞」，我只可以咁答：「我希望佢哋今次可以盡好本分」。
[長期層面：以街坊需求為中心嘅重建]
我見好多人或者專業人士都提出唔同方案，但我覺得依家最重要嘅係知道街坊想要啲咩，需要啲咩，然後再去睇唔同嘅方案究竟可唔可以實現到佢哋所渴求嘅結果，呢樣先係最重要。大家可能會覺得街坊應該點點點，或者覺得某啲方案係所謂對佢哋最「有利」，但大家始終唔係宏福街坊，唔會完全知道佢哋仲有好多唔同嘅考慮——包括情感同情緒。我覺得大家無謂去強迫街坊去接受所謂「最好方案」，反而應該透過了解每戶每人嘅情況，畀唔同嘅選擇佢哋自己揀，甚至提供好幾個，甚至幾十個地方同時間，畀一班街坊去表達自己意見同感受。的確，咁樣係需要用好多時間，但如果真係想以人為本，係值得用呢啲時間同資源去處理。
宏福火災係香港近年來最令人心痛嘅事件之一，而災後重建更加唔係簡單一兩個月內可以完成嘅。我相信，真正嘅重建應該係以人為本，以街坊為中心，清晰嘅資訊流通、透明嘅決策過程，同埋真正傾聽街坊聲音。
如果大家有任何想法、建議，或者係需要協助，歡迎同一切討論。如果大家有情緒需要，可以搵唔同嘅專業人士輔導，或者身邊嘅朋友傾訴，請咁多位照顧好自己。
最後，祝願今次火災中不幸離世嘅街坊安息。
作者：姚鈞豪 Herman Yiu Kwan
https://www.facebook.com/HermanYiu.TP
支持我們：https://points-media.com/supports/
