加拿大「貼士文化」一直困擾不少新移加港人，不知甚麼時候須付貼士、應該付多少貼士，更加要注意的是，有餐廳隨時會將貼士自行加在帳單上。近日有網民在社交平台發帖，指在加拿大卑詩省城市列治文一間日式餐廳用膳，埋單合共70.45加元（約400港元），稅項為5%即3.52加元；餐廳卻在未徵詢顧客下，自行在帳單加上15%貼士，即10.57加元（約60港元）。發帖網民稱「畀錢嗰時候話我知已經加落張單，條氣就唔係好順」。
事件發生剛過去的星期日（2月5日），該網民到一間名為「Tokyo Joe Sushi Factory」的日式餐廳晚膳，點了4項食品，據帳單顯示，埋單計70.45加元，稅項3.52加元；但帳單上還有貼士一項，餐廳自行加上15%，即10.57加元，總計費用為84.54加元。
在未徵求同意下遭「被貼士」，令該網民甚為不滿，他在facebook帖文稱，「我通常俾15%至25%小費，但係畀錢嗰時候話我知已經加落張單，條氣就唔係好順」。
事件引起網民熱烈討論，「溫哥華小費文化真係失控」、「最憎呢啲，咪旨意我会再去」、「強收貼士，可以關門大吉」、「我試過就咁買個buff佢已經default左10% tips，無預到手快一按ok就俾左」、「好睇佢餐牌有冇寫清楚加15%服務費，如果有寫，你可以選擇唔幫襯，其實咪係同香港一樣，但如果冇寫，你可以投訴」、「要收冇問題，但寫上餐牌唔夠，要入座果時講清楚，法例唔係你寫咗就assume 人地睇到」、「最搞笑嘅係下面嗰行字。『這張單已包括了15的小費，但不是強制性的。』即係點呀？已包括但又唔係強制性，但又冇得自己選擇，帳單已在桌面。可以點做？反枱走人？」
亦有網民留言教路應對辦法，「祗付賬單減去小費，斗令貼士都唔俾，奈我何咩」、「如果張單已經加咗小費，咪比齊頭$85囉」、「加咗在單上不等於一定要俾!如果沒在餐單上寫明,我就不會俾」、「如果發生在我身上，我一定會叫佢 Void 番個 tips 出黎， 我用公司咭埋單，老細話 tips 係我自己錢，比小費我從來都唔介意，我會比cash, 但絕對唔容忍呢啲做法，霸王硬上弓，離晒譜！」
事實上，強收貼士當然不止一間餐廳，有網民在留言上載之前光顧的另一間餐廳，也是自行加了16%貼士在帳單上。
市場調查公司Research Co.早前在網上調查加拿大人付貼士的習慣，詢問在9種不同情況下，他們認為甚麼是可以接受貼士額。最新一份調查顯示，如消費者在一間並不繁忙的餐廳獲得良好服務（exceptional service），37%受訪者願支付消費額5到19%小費；如在一間非常繁忙餐館獲得良好服務，則34%願支付20%以上小費。
如果評價純粹是「好」而非「良好」，34到41%受訪者願支付15到19%小費，僅19%願支付20%以上小費，受訪者中4%表示不會支付小費。平均而言，如果獲得平均滿意的服務（average service），41%受訪者願支付10到14%貼士，28%願支付15到19%貼士，僅4%願支付20%以上貼士。
Research Co.主席Mario Canseco表示，從受訪者年齡劃分，佔4成的55歲以上受訪者直指，如在餐廳用膳時受冷待，不會給貼士；此比例在34到54歲受訪者中為29%；18到34歲受訪者中為24%。
調查並顯示，對於一些餐廳選擇取消貼士、改為給員工加薪的做法，59%受訪者表示同意和非常同意，直指如果服務員有較佳薪金待遇，貼士文化應該取消。
新聞來源：棱角編輯部、Research Co.
