近日有唔同嘅跨國人力資源公司釋出報告，針對澳洲市場，報告作出咗對未來人力資源市場發展嘅一啲數據同埋分析。雖然唔同嘅公司佢哋着重喺唔同嘅範疇去報道，不約而同佢哋都指向同一個方向，就係過去兩、三年嘅僱員市場已經慢慢逆轉，唔係話立即嘅去到另外一個極端係僱主市場，而係睇到開始進入一個平衡點。
基礎上呢個係一個「阿媽係女人」嘅理論：demand and supply。
喺近期勞動市場基礎上都已經能夠反映到。過去兩年嘅招聘大部份時間都未能夠喺短時間之內收到一定數量嘅履歷，我講緊嘅係任何職位，放去求職網站到最後可能30日嘅刊登期，最後所收返嚟嘅冇20份履歷。今年係好明顯有一個改變嘅，喺一啲比較高級嘅職位，求職率仍然唔係太高，比起過去兩年，所收到嘅履歷係多咗大概50%至60%左右，而且裏面嘅應徵者，質素比起兩年前為高。
最誇張係我喺墨爾本招聘一個畢業生職位，收到嘅履歷高達800份！我仲要講緊只係擺咗15日廣告最後因為太多人申請而要將佢下架。而家喺雪梨亦都有一個畢業生職位，放咗七日，都已經有150人申，比起兩年前同一個職位，應聘人數上升咗三倍都不特止。薪酬係非常入門級，基礎上只係啱啱掂到最低工資嗰個水平，而所收返嚟嘅履歷，有學士、有碩士，實在令人吃驚。
喺最近六個月，我哋都用一個相對過去兩年嚟講低廉嘅價錢請到合適嘅員工，佢哋無論係學歷、經驗、以及質素，都比起前兩年所請嘅員工為佳，不但係有行業要求嘅履歷，更加係肯學肯做，對比起之前嗰班local，實在相距甚遠。
因此大部份人力資源公司都認為，未來嘅招聘方向基礎上都會係有更加多嘅應徵者可以選擇，而佢哋嘅質素亦都比起過往嘅為高，企業會因此開始進行整頓嘅工作，將能夠預計嘅係汰弱留強會係嚟緊未來12個月好多企業會Focus嘅方向。
除咗係市場開始傾向僱主嗰邊，仲有冇其他比較值得大家去留意嘅Finding呢？我哋下星期繼續。
關於作者：作者為一企業人事部職員，同時為合資格Life Coach，國際九型人格師、MBTI及DISC Advance持牌培訓師。最鍾意玩玩具同寫下嘢。現我城隕落，無比哀嘆，盼一盡綿力，將文化保存，以文會友，抒發一下。這篇文章，歡迎轉載。
